എറണാകുളം: ദുരൂഹ സാഹചര്യത്തിൽ പെരുമ്പാവൂർ ബസ്റ്റാന്റ് കെട്ടിടത്തിന്റെ ടെറസിൽ കണ്ടെത്തിയ മൃതദേഹം ഇടുക്കി സ്വദേശിയുടേത്. രണ്ട് ദിവസം പഴക്കമുള്ള മൃതദ്ദേഹം ഇടുക്കി ഉപ്പുതറ സ്വദേശി സുധീഷിന്‍റെതാണെന്ന് കണ്ടെത്തി. സ്വകാര്യ ബസ്റ്റാന്റ് കെട്ടിട സമുച്ചയത്തിന്‍റെ ടെറസിൽ കഴിഞ്ഞ ചൊവ്വാഴ്ച വൈകീട്ട് ആറുമണിയോടെയാണ് മൃതദേഹം കണ്ടെത്തിയത്. രണ്ട് ദിവസം വെയിലേറ്റതിനാൽ അഴുകി തുടങ്ങിയിരുന്ന മൃതദേഹം കളമശേരി മെഡിക്കൽ കോളേജിലത്തിച്ച് പോസ്റ്റ്മോർട്ടം നടത്തി. പ്രാഥമിക നിഗമനത്തിൽ മൃതദേഹത്തിൽ മുറിവുകളൊന്നും കണ്ടെത്തിയിട്ടില്ല. എന്നാല്‍ പോസ്റ്റുമോർട്ടം റിപ്പോർട്ട് കിട്ടിയ ശേഷമേ മരണകാരണം കണ്ടെത്താന്‍ സാധിക്കൂ.
ചൊവ്വാഴ്ച വൈകീട്ട് ആറുമണിയോടെ ടെറസിലെത്തിയ യുവാവാണ് മൃതദേഹം കണ്ടെത്തിയത്. തലേ ദിവസവും മ്യതദേഹം കണ്ടിരുന്നെങ്കിലും മദ്യപിച്ച് കിടക്കുന്നതാണെന്ന് തെറ്റ് ധരിക്കുകയായിരുന്നു. മൃതദേഹം കണ്ടെത്തിയ ബസ് സ്റ്റാന്റ് ഇതര സംസ്ഥാന ലൈംഗിക തൊഴിലാളികളുടേയും വിഹാര കേന്ദ്രമാണ്. അതുകൊണ്ട് തന്നെ ഇവരിലേക്കും അന്വേഷണം വ്യാപിപ്പിക്കും. ബസ് സ്റ്റാന്റിൽ തമ്പടിക്കുന്ന ലൈംഗിക തൊഴിലാളികൾക്കെതിരെയും നിരന്തരം നഗരത്തിൽ നടക്കുന്ന കൊലപാതകങ്ങളിലും പ്രതിഷേധിച്ച് സ്ഥാപന ഉടമകൾ ഒന്നടങ്കം രംഗത്തിറങ്ങിയിട്ടുണ്ട്.
