എറണാകുളം : കൊച്ചിയിൽ നോൺ ഹലാൽ ഭക്ഷണം വിളമ്പിയതിന് അക്രമികൾ മർദിച്ചെന്ന് വ്യാജ പ്രചാരണം നടത്തിയ ഹോട്ടലുടമയെയും ഭർത്താവിനെയും മറ്റ് രണ്ട് പേരെയും പൊലീസ് അറസ്റ്റ് ചെയ്‌തു. കൊലപാതകശ്രമം, മോഷണം, സമൂഹത്തിൽ മതസ്‌പർധ വളർത്തൽ എന്നിവയുൾപ്പടെയുള്ള കേസുകളിലാണ് നടപടിയെന്ന് പൊലീസ് അറിയിച്ചു.
ഹോട്ടലുടമ തുഷാര(40), ഭർത്താവ് അജിത്ത്(39), സുനിൽ കുമാർ(39), അപ്പു(31) എന്നിവരാണ് അറസ്റ്റിലായത്. കോട്ടയം പൊൻകുന്നത്ത് ഒളിവിൽ കഴിയുകയായിരുന്നു ഇവർ. നോൺ ഹലാൽ ഭക്ഷണം എന്ന ബോർഡ് തന്‍റെ ഹോട്ടലിൽ തൂക്കിയതിന് ചിലര്‍ തന്നെ ആക്രമിക്കുകയും ഹോട്ടൽ അടിച്ചുതകർക്കുകയും ചെയ്‌തെന്ന് ആരോപിച്ച് തുഷാര കഴിഞ്ഞയാഴ്‌ച ഫേസ്‌ബുക്കിൽ വീഡിയോ പോസ്റ്റ് ചെയ്‌തിരുന്നു.
Also Read: ഫോണെടുക്കുന്നില്ലെന്ന് പരാതി ; പരീക്ഷാഭവനിൽ മന്ത്രി വി. ശിവൻകുട്ടിയുടെ മിന്നൽ സന്ദർശനം
അന്വേഷണത്തിൽ തുഷാരയും കൂട്ടാളികളും സമീപത്തുള്ള കടകളിൽ നിന്ന് മോഷണം നടത്തിയതായി വ്യക്തമായതായും ഇതിന്‍റെ സിസിടിവി ദൃശ്യങ്ങൾ ലഭിച്ചതായും പൊലീസ് പറഞ്ഞു. പ്രതികൾ സമീപത്തുള്ള കടയുടമയെ ആക്രമിച്ചു. പിന്നാലെ മതവിദ്വേഷം വളർത്തുന്ന തരത്തിലുള്ള വീഡിയോ ഫേസ്‌ബുക്കിൽ പോസ്റ്റ് ചെയ്യുകയായിരുന്നെന്നും പൊലീസ് പറയുന്നു.
നിരവധി പേരാണ് തുഷാരയുടെ വീഡിയോ സമൂഹ മാധ്യമങ്ങളിൽ പങ്കുവച്ചത്. ഐപിസി സെക്ഷൻ 153 എ അടക്കമുള്ള വകുപ്പുകൾ പ്രതികൾക്കെതിരെ ചുമത്തിയതായും പൊലീസ് അറിയിച്ചു.
