മരട് ഫ്ലാറ്റ്; നഷ്‌ടപരിഹാരം തീരുമാനിക്കാനുള്ള യോഗം തുടങ്ങി

മരടിലെ ഫ്ലാറ്റ് ഉടമകൾക്ക് നഷ്‌ടപരിഹാരം നൽകുന്നതിനുള്ള യോഗ്യതയും ജസ്റ്റിസ് കെ. ബാലകൃഷ്ണൻ നായരുടെ നേതൃത്വത്തിലുള്ള മൂന്നംഗ സമിതി വിലയിരുത്തും.

എറണാകുളം: മരട് ഫ്ലാറ്റ് ഉടമകളുടെ നഷ്‌ടപരിഹാരം തീരുമാനിക്കുന്നതിനുള്ള മൂന്നംഗ സമിതിയുടെ ആദ്യ യോഗം കൊച്ചിയിൽ ആരംഭിച്ചു. ജസ്റ്റിസ് കെ. ബാലകൃഷ്ണൻ നായരുടെ നേതൃത്വത്തിൽ നടക്കുന്ന യോഗത്തിൽ സമിതി അംഗങ്ങളായ മുൻ ചീഫ് സെക്രട്ടറി ജോസ് സിറിയക്, തിരുവനന്തപുരം കെഎസ്ആർഎ യിലെ എൻജിനീയർ ആർ. മുരുകേശൻ എന്നിവരും പങ്കെടുക്കും.

മരടിലെ ഫ്ലാറ്റ് സമുച്ചയങ്ങൾ പൊളിച്ചു നീക്കുന്നതിനുള്ള സാങ്കേതിക ഉപദേശം നൽകാൻ സർക്കാർ നിയോഗിച്ച പ്രശസ്‌ത എൻജിനീയർ എസ്. ബി. സർവോതെയ ഇന്ന് കൊച്ചിയിലെത്തും. തുടർന്ന് നാളെ സബ് കലക്ടറുടെ നേതൃത്വത്തിൽ ഫ്ലാറ്റുകൾ സന്ദർശിച്ച ശേഷം പൊളിക്കുന്നതിനായി ഷോർട് ലിസ്റ്റ് ചെയ്തിരിക്കുന്ന കമ്പനികളുടെ പ്രതിനിധികളുമായി സർവോതെയ കൂടിക്കാഴ്ച നടത്തും.

അതേസമയം ഫ്ലാറ്റുകൾ പൊളിക്കുന്നതിനുള്ള ജോലികൾക്കായി ആറംഗ സംഘത്തെ ചുമതലപ്പെടുത്താൻ നഗരസഭയുടെ ഇന്നലെ ചേർന്ന അടിയന്തര കൗൺസിൽ യോഗം തീരുമാനിച്ചു. ഫ്ലാറ്റ് പൊളിക്കുന്ന നടപടിയുമായി മുന്നോട്ടു പോകുന്ന സാഹചര്യത്തിൽ മരട് നഗരസഭയുടെ ദൈനംദിന പ്രവർത്തനങ്ങളെ ബാധിക്കാതിരിക്കാനാണ് കൗൺസിൽ യോഗം ഇത്തരത്തിലൊരു തീരുമാനമെടുത്തത്. ഫ്ലാറ്റുകൾ പൊളിക്കുമ്പോൾ നഷ്‌ടപരിഹാരം ലഭിക്കേണ്ട ഫ്ലാറ്റ് ഉടമകളുടെ പട്ടിക നഗരസഭ ഉടൻതന്നെ സർക്കാരിന് കൈമാറും.