എറണാകുളം : കൊച്ചി മേയര്‍ അഡ്വ. എം. അനിൽകുമാറിന് തീവ്രവാദ സംഘടനകളുടെ പേരിൽ ഭീഷണി കത്ത്. തപാൽ മാർഗമെത്തിയ കത്തിൽ ബിന്‍ലാദന്‍ ഉള്‍പ്പെടെയുളള തീവ്രവാദികളുടെ ചിത്രങ്ങളുമുണ്ട്. കത്തിന്‍റെ ഉറവിടം അന്വേഷിക്കണമെന്നാവശ്യപ്പെട്ട് മേയര്‍ പൊലീസിൽ പരാതി നൽകി.
കൊച്ചി കടപ്പുറത്ത് നഗ്നനായി നടത്തിക്കുമെന്നും പത്രമാധ്യമങ്ങളില്‍ ഫോട്ടോ നൽകി അഹങ്കാരം കാട്ടിയാല്‍ രാത്രി ഇരുട്ടടി കിട്ടുമെന്നും കൈകാലുകള്‍ അടിച്ച് ഒടിക്കുമെന്നും കത്തില്‍ പറയുന്നു. സഭ്യേതര ഭാഷയില്‍ കൊച്ചി മേയറെ കത്തില്‍ അധിക്ഷേപിക്കുന്നു. തികഞ്ഞ അസഹിഷ്‌ണുതയാണ് കത്തിൽ പ്രകടമാകുന്നത്. ചീഫ് കമാൻഡർ ഓഫ് താലിബാന്‍, ഫക്രുദ്ദീന്‍ അല്‍ത്താനി എന്നയാളുടെ പേരില്‍ എഴുതിയിട്ടുളള കത്ത് സിറ്റി പൊലീസ് കമ്മിഷണര്‍ക്ക് കൈമാറി.
ALSO READ: 'കാരണം വ്യക്തിപരം'; ഇഡിക്ക് മുന്നിൽ ഹാജരാകാൻ സാവകാശം തേടി കുഞ്ഞാലിക്കുട്ടി
കത്തെഴുതിയവരെയും അവരുടെ ഉദ്ദേശത്തെയും വെളിച്ചത്തുകൊണ്ടുവരാനും നിയമനടപടി സ്വീകരിക്കാനും പൊലീസ് തയ്യാറാകണമെന്ന് ഇടതുമുന്നണി പാർലമെന്‍ററി പാർട്ടി സെക്രട്ടറി ബെനഡിക് ഫെർണാണ്ടസ് ആവശ്യപ്പെട്ടു.
ഇത്തരം ഭീഷണികള്‍ കൊണ്ടൊന്നും മേയര്‍ അനില്‍കുമാറിന്‍റെ നേതൃത്വത്തിൽ കൊച്ചി നഗരസഭ കൗണ്‍സില്‍ സ്വീകരിച്ചുവരുന്ന ജനോപകാരപ്രദവും, വികസനോന്മുഖവുമായ പ്രവര്‍ത്തനങ്ങള്‍ക്ക് തടസം സൃഷ്‌ടിക്കാമെന്ന പ്രതിലോമ ശക്തികളുടെ മോഹം നടപ്പാകില്ലെന്നും അദ്ദേഹം വ്യക്തമാക്കി.
