എറണാകുളം : തിരുവാർപ്പിൽ ബസ് ഉടമയെ മർദിച്ച സംഭവത്തിൽ ( Thiruvarppu Bus Owner Attacked Case in Kottayam) തുറന്ന കോടതിയിൽ നിരുപാധികം മാപ്പ് പറയാൻ ഒരുക്കമെന്ന് സിഐടിയു (CITU) നേതാവ് കെ അജയൻ ഹൈക്കോടതിയിൽ (Thiruvarppu Private Bus Owner Case In Kerala High Court). സത്യവാങ്‌മൂലത്തിലൂടെയാണ് സിഐടിയു നേതാവ് ഇക്കാര്യം ഹൈക്കോടതിയില്‍ ആവശ്യപ്പെട്ടത്. കേസില്‍ കോടതിയില്‍ നേരിട്ട് ഹാജരാകണമെന്നതും കോടതിയലക്ഷ്യ നടപടിയും ഒഴിവാക്കണമെന്നാണ് കെ അജയന്‍റെ ആവശ്യം.
പൊലീസ് സംരക്ഷണ ഉത്തരവ് നിലനില്‍ക്കെ ആയിരുന്നു കോട്ടയം തിരുവാര്‍പ്പില്‍ സ്വകാര്യ ബസുടമയെ സിഐടിയു നേതാക്കള്‍ കയ്യേറ്റം ചെയ്‌തത്. ഈ സംഭവത്തില്‍ സ്വമേധയാ ആയിരുന്നു ഹൈക്കോടതി കോടതിയലക്ഷ്യ കേസെടുത്തത്. ഈ സാഹചര്യത്തിലാണ് താന്‍ തുറന്ന കോടതിയില്‍ മാപ്പ് പറയാന്‍ തയ്യാറാണെന്ന് അജയന്‍ അറിയിച്ചിരിക്കുന്നത്.
മനഃപൂര്‍വം കോടതി ഉത്തരവുകളൊന്നും ധിക്കരിക്കപ്പെട്ടിട്ടില്ല. തനിക്കെതിരെ ക്രിമിനല്‍ കേസ് നിലവിലുണ്ട്. കോടതിയില്‍ നേരിട്ട് ഹാജരാകണമെന്നതും കോടതിയലക്ഷ്യ നടപടിയും റദ്ദാക്കണമെന്നും ഉടമയുടെ വാഹനം തടഞ്ഞിട്ടില്ലെന്നും ഹൈക്കോടതിയില്‍ സമര്‍പ്പിച്ച സത്യവാങ്‌മൂലത്തില്‍ അജയന്‍ വ്യക്തമാക്കി.
കോടതിയലക്ഷ്യ കേസില്‍ തന്‍റെ പേര് കക്ഷി ചേര്‍ത്തിരിക്കുന്ന മേല്‍വിലാസം മോട്ടോർ മെക്കാനിക്ക് യൂണിയൻ കോട്ടയം ജില്ല സെക്രട്ടറി എന്നാണ്. അത്തരത്തില്‍ ഒരു സംഘടനയുടെ ഭാഗമായ ആളല്ല താനെന്നും അജയന്‍ സത്യവാങ്‌മൂലത്തില്‍ പറയുന്നു. നിലവില്‍ താന്‍ തിരുവാര്‍പ്പ് പഞ്ചായത്ത് അംഗമാണെന്നും സിഐടിയു നേതാവ് വ്യക്തമാക്കിയിട്ടുണ്ട്.
അതേസമയം, കോടതിയലക്ഷ്യ കേസ് പരിഗണിക്കുന്നത് വരുന്ന തിങ്കളാഴ്‌ചയിലേക്ക് (18 സെപ്‌റ്റംബര്‍) ഹൈക്കോടതി മാറ്റി. കോടതിയുടെ ഇടക്കാല ഉത്തരവ് നിലനില്‍ക്കെ ബസുടമ ആക്രമിക്കപ്പെട്ടതിനെ തുടര്‍ന്നായിരുന്നു സംഭവത്തില്‍ ജസ്റ്റിസ് എൻ നഗരേഷ് സ്വമേധയാ തന്നെ കോടതിയലക്ഷ്യ കേസ് എടുത്ത് തുടര്‍ നടപടികള്‍ സ്വീകരിച്ചത്. സംഭവത്തില്‍ ബസ് ഉടമയ്‌ക്കല്ല കോടതിയുടെ മുഖത്താണ് അടി കിട്ടിയതെന്ന് കോടതി നേരത്തെ വിമര്‍ശിച്ചിരുന്നു.
കൂലി തര്‍ക്കത്തെ തുടര്‍ന്ന് കോട്ടയം തിരുവാര്‍പ്പ് സ്വദേശിയുടെ സ്വകാര്യ ബസിന് മുന്നില്‍ സിഐടിയു പ്രവര്‍ത്തകര്‍ കൊടി കുത്തിയിരുന്നു. ഇതിനെതിരെ സമരവുമായി പിന്നീട് ബസുടമ രംഗത്തെത്തുകയും ചെയ്‌തിരുന്നു. ഇതിന് പിന്നാലെ ആയിരുന്നു ബസുടമയെ മര്‍ദിച്ചത്.
ഇതിന്‍റെ ദൃശ്യങ്ങള്‍ പുറത്തുവരികയും വിഷയം വലിയ രീതിയില്‍ ചര്‍ച്ചയാവുകയും ചെയ്‌തു. അതേസമയം, സംഭവത്തില്‍ പൊലീസിനെതിരെയും അന്വേഷണം വേണമെന്ന് നേരത്തെ ബസുടമ കോടതിയില്‍ ആവശ്യപ്പെട്ടിരുന്നു.
