എറണാകുളം: കൊവിഡ് ഭീഷണിയുടെ സാഹചര്യത്തിൽ ടാക്‌സി വാഹനങ്ങളിൽ സുരക്ഷിത യാത്ര ഒരുക്കാൻ പുത്തൻ മാർഗവുമായി എറണാകുളം ജില്ലാ ഭരണകൂടം. ടാക്‌സി വാഹനങ്ങളിൽ ഫൈബർ ക്ലിയർ ഗ്ലാസ് ഉപയോഗിച്ച് ഡ്രൈവർ സീറ്റിനെയും പിൻ സീറ്റിനെയും തമ്മിൽ വേർതിരിച്ച് സുരക്ഷിത യാത്രക്കുള്ള സംവിധാനമാണ് ജില്ലാ ഭരണകൂടം ഒരുക്കുന്നത്.
വാഹനത്തിൽ കയറുന്നതിന് മുമ്പ് ഡ്രൈവർ യാത്രക്കാർക്ക് സാനിറ്റൈസർ നൽകും. വാഹനത്തിന്‍റെ ഡോർ ഡ്രൈവർ തന്നെ തുറന്ന് നൽകുകയും ചെയ്യും. പ്രത്യേക പാളി ഉപയോഗിച്ച് സീറ്റുകൾ വേർതിരിച്ചിരിക്കുന്നതിനാൽ ഡ്രൈവർക്ക് യാത്രക്കാരുമായി അടുത്ത് ഇടപഴകേണ്ടി വരുന്നത് ഒഴിവാക്കാനാകും. ഇത് ഡ്രൈവർക്ക് രോഗബാധ ഉണ്ടാകുന്നത് തടയാൻ സഹായിക്കും. ഡ്രൈവറെ കൂടാതെ രണ്ട് യാത്രക്കാരെയാണ് ടാക്‌സി കാറുകളിൽ അനുവദിക്കുക. മുൻ സീറ്റിൽ യാത്ര ചെയ്യുന്നതിന് ഡ്രൈവർക്ക് മാത്രമാണ് അനുമതി. ഡ്രൈവർക്ക് മാസ്‌കിനൊപ്പം ഗ്ലൗസും നിർബന്ധമാണ്. യാത്രക്കാർ മാസ്‌ക് നിർബന്ധമായും ധരിച്ചിരിക്കണം. എയർ കണ്ടീഷൻ ഉപയോഗിക്കരുതെന്ന നിർദേശവുമുണ്ട്.
