എറണാകുളം : കൊച്ചിയിൽ വൃദ്ധയെ ബലാത്സംഗം ചെയ്തു (Sexual assault against elderly woman Kochi). പ്രതിയായ അതിഥി തൊഴിലാളിയെ പൊലീസ് അറസ്റ്റു ചെയ്തു. ഗുരുതരമായി പരിക്കേറ്റ അറുപത്തിരണ്ടു കാരിയെ കളമശ്ശേരി മെഡിക്കൽ കോളജിൽ പ്രവേശിപ്പിച്ചു.
കഴിഞ്ഞ ബുധനാഴ്‌ച വൈകുന്നേരത്തോടെയാണ് ക്രൂരമായ ലൈംഗിക പീഡനം നടന്നത്. പൊലീസ് സിസിടിവി ദൃശ്യങ്ങൾ ഉൾപ്പടെ ശേഖരിച്ച് നടത്തിയ പരിശോധനയിലാണ് പ്രതിയെ കുറിച്ച് സൂചന ലഭിച്ചത്. അസം സ്വദേശിയായ ഫിർദൗസ് അലിയെ പൊലീസ് കസ്റ്റഡിയിലെടുക്കുകയും ചോദ്യം ചെയ്യലിനൊടുവിൽ അറസ്റ്റ് രേഖപ്പെടുത്തുകയായിരുന്നു.
പ്രതിയെ ഇന്ന് കോടതിയിൽ ഹാജരാക്കും. കസ്റ്റഡിയിൽ വാങ്ങി പ്രതിയെ സംഭവ സ്ഥലത്ത് ഉൾപ്പടെ എത്തിച്ച് തെളിവെടുപ്പ് നടത്തും. ആലപ്പുഴ സ്വദേശിയായ വയോധിക എറണാകുളം നോർത്ത് പൊലീസ് സ്റ്റേഷന് സമീപം ചെറിയ രീതിയിലുള്ള കൂലി വേലകൾ ചെയ്‌തായിരുന്നു ജീവിച്ചിരുന്നത് (Alappuzha woman raped in Kochi). അസം സ്വദേശിയായ പ്രതി ഫിർദൗസ് കഴിഞ്ഞ ബുധനാഴ്‌ച വൈകുന്നേരം വയോധികയെ തന്ത്രപൂർവം പൊന്നുരുന്നിക്ക് സമീപം ആളൊഴിഞ്ഞ ഭാഗത്ത് എത്തിച്ച് ലൈഗിംകമായി ഉപദ്രവിക്കുകയായിരുന്നു.
റെയിൽവേ ട്രാക്കിന് സമീപം ആളൊഴിഞ്ഞ ഭാഗത്ത് വയോധികയെ ഉപേക്ഷിച്ച് പ്രതി കടന്നു കളയുകയായിരുന്നു. വയോധികയുടെ കരച്ചിൽ കേട്ടെത്തിയ നാട്ടുകാരാണ് പൊലീസിൽ വിവരമറിയിച്ചത്. സ്വകാര്യ ഭാഗത്ത് ഉൾപ്പടെ മുറിവേറ്റ് രക്തം വാർന്ന നിലയിലായിരുന്ന വയോധികയെ കളമശ്ശേരി മെഡിക്കൽ കോളജിൽ പ്രവേശിപ്പിക്കുകയായിരുന്നു.
ഇവർ അപകട നില തരണം ചെയ്‌തതായാണ് ലഭ്യമായ വിവരം. നാട്ടുകാരുടെ ജാഗ്രതയോടുള്ള ഇടപെടലാണ് വയോധികയുടെ ജീവൻ രക്ഷിച്ചത്.
