എറണാകുളം: കൊച്ചിയിലെ കുസാറ്റ് ടെക്‌ഫെസ്റ്റിലെ തിക്കിലും തിരക്കിലും പെട്ട് നാല് വിദ്യാര്‍ഥികള്‍ മരിച്ചു. നിരവധി പേര്‍ക്ക് പരിക്ക്. രണ്ട് ആണ്‍കുട്ടികളും രണ്ട് പെണ്‍കുട്ടികളുമാണ് മരിച്ചത്. 60 ലധികം വിദ്യാര്‍ഥികള്‍ക്ക് പരിക്കേറ്റതായാണ് വിവരം. 2 വിദ്യാര്‍ഥികളുടെ നില ഗുരുതരമാണ്.
കൂത്താട്ടുകുളം സ്വദേശി അതുല്‍ തമ്പി, വടക്കന്‍ പറവൂര്‍ സ്വദേശി ആന്‍ റുഫ്‌ത, താമരശ്ശേരി സ്വദേശി സാറാ തോമസ്, സുഹൃത്തിനൊപ്പം കുസാറ്റ് മേള കാണാനെത്തിയെ പാലക്കാട് മുണ്ടൂര്‍ സ്വദേശി ആല്‍വിന്‍ ജോസഫ് എന്നിവരാണ് മരിച്ചത്.
ഗാനമേള നടന്ന ഓഡിറ്റോറിയത്തിലാണ് അപകടം. ടെക് ഫെസ്റ്റിന്‍റെ ഭാഗമായി പ്രശസ്‌ത ഗായിക നിഖിത ഗാന്ധിയുടെ ഗാനമേളക്കിടെയാണ് സംഭവം. പരിക്കേറ്റവരെ കളമശ്ശേരി മെഡിക്കല്‍ കോളജില്‍ പ്രവേശിപ്പിച്ചു. പരിപാടിയുടെ സമാപന ദിവസമാണിന്ന്.
ഗാനമേളക്കിടെ വിദ്യാര്‍ഥികള്‍ ഓഡിറ്റോറിയത്തില്‍ നൃത്തം ചെയ്‌തിരുന്നു. ഇതിനിടെ അപ്രതീക്ഷിതമായ മഴ പെയ്‌തതോടെ പുറത്ത് നിന്നും നിരവധി പേര്‍ ഓഡിറ്റോറിയത്തിലേക്ക് ഇരച്ചു കയറി. ഇതോടെ തിക്കും തിരക്കും വര്‍ധിച്ച് അപകടമുണ്ടാകുകയായിരുന്നു.
