എറണാകുളം: വനിത ഹൗസ് കീപ്പർ തസ്‌തികയിലേക്ക് നേരിട്ട് അപേക്ഷിക്കാൻ ട്രാൻസ് ജെൻഡർ യുവതിക്ക് അനുവാദം നൽകിയ അഡ്മിനിസ്ട്രേറ്റീവ് ട്രൈബ്യൂണൽ ഉത്തരവ് ശരി വച്ച് ഹൈക്കോടതി. ട്രൈബ്യൂണൽ ഉത്തരവിനെതിരെ പിഎസ്‌സി നൽകിയ ഹർജിയിലാണ് കോടതി നടപടി. ഹോമിയോ മെഡിക്കൽ കോളജിലെ വനിത ഹൗസ് കീപ്പർ തസ്‌തികയിലേക്ക് അപേക്ഷിക്കാൻ തടസം നേരിട്ട പാലക്കാട് സ്വദേശിയായ ട്രാൻസ് ജെൻഡർ യുവതി അനീറ കബീർ നേരത്തെ കേരള അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ച് അനുകൂല ഇടക്കാല ഉത്തരവ് നേടിയിരുന്നു.
നേരിട്ട് പിഎസ്‌സിയ്ക്ക് പ്രസ്‌തുത തസ്‌തികയിലേക്ക് അപേക്ഷ സമർപ്പിക്കാനായിരുന്നു ട്രൈബ്യൂണൽ ഇടക്കാല ഉത്തരവ്. എന്നാൽ വനിതകൾക്ക് മാത്രമുള്ള തസ്‌തികയാണെന്നും വനിത ഹോസ്റ്റലിൽ താമസിക്കേണ്ടി വരുമെന്നും സുരക്ഷ മുൻ നിർത്തി സ്ത്രീകളെ മാത്രമെ ജോലിക്ക് പരിഗണിക്കാനാകൂവെന്ന് ചൂണ്ടിക്കാട്ടിയായിരുന്നു പി.എസ്.സിയുടെ ഹർജി.
പരാതിക്കാരിയുടെ ആക്ഷേപത്തിന്മേൽ മൂന്ന് മാസത്തിനകം ട്രൈബ്യൂണൽ തീരുമാനമെടുക്കണമെന്ന് ഉത്തരവിട്ട ഹൈക്കോടതി ട്രൈബ്യൂണലിന്‍റെ ഇടക്കാല ഉത്തരവിൽ ഇടപെടുന്നില്ലെന്നും നിലപാടെടുത്തു. സാങ്കേതിക പ്രശ്‌നം ഓൺലൈൻ അപേക്ഷ സമർപ്പിക്കാൻ കഴിയാത്തതിനെ തുടർന്നായിരുന്നു അനീറ 2019ലെ ട്രാൻസ് ജെൻഡർ പേഴ്‌സണ്‍സ് നിയമപ്രകാരം അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ചത്.
പാലക്കാട് ഒറ്റപ്പാലം സ്വദേശിയായ അനീറയുടെ ജോലിയുമായി ബന്ധപ്പെട്ട് നേരത്തെയും വാര്‍ത്തകള്‍ പുറത്ത് വന്നിരുന്നു. സമൂഹത്തില്‍ ട്രാന്സ് ജെന്‍ഡര്‍ വിഭാഗം ഇപ്പോഴും ജോലി സംബന്ധമായ വിഷയങ്ങളില്‍ വെല്ലുവിളികള്‍ ഏറെ നേരിടുന്നുണ്ടെന്നതിന് ഉദാഹരണമാണ് അനീറയുടെ ജീവിതം. ട്രാന്സ് ജെന്‍ഡര്‍ സംവരണവുമായി ബന്ധപ്പെട്ട് സുപ്രീംകോടതി വിധി പ്രഖ്യാപിച്ചെങ്കിലും സര്‍ക്കാര്‍ അത് നടപ്പാക്കി തുടങ്ങിയിട്ടില്ലെന്ന് നേരത്തെ അനീറ ആരോപിച്ചിരുന്നു.
സര്‍ക്കാര്‍ തസ്‌തികയില്‍ ട്രാന്സ് ജെന്‍ഡേഴ്‌സിന് പ്രത്യേക സംവരണം ഏര്‍പ്പെടുത്തണമെന്നാവശ്യപ്പെട്ട് അനീറ നേരത്തെ നിവേദനം സമര്‍പ്പിച്ചിരുന്നു. നിവേദനം സമര്‍പ്പിച്ചിട്ടും നടപടികളില്ലാതിരുന്നതിനെ തുടര്‍ന്ന് അനീറ ദയാവധത്തിന് അപേക്ഷ സമര്‍പ്പിച്ചതും മാധ്യമങ്ങളില്‍ ഏറെ ചര്‍ച്ച വിഷയമായി.
ട്രാന്സ് ജെന്‍ഡറായി ജീവിക്കാനാകുന്നില്ലെന്ന് കാണിച്ചാണ് ദയാവധത്തിന് അപേക്ഷ സമര്‍പ്പിച്ചത്. ഇതിന് പിന്നാലെ വിദ്യാഭ്യാസ മന്ത്രി വി.ശിവന്‍കുട്ടി ഇടപെട്ട് അനീറക്ക് ചെര്‍പ്പുളശേരി ഗവണ്‍മെന്‍റ് ഹയര്‍ സെക്കന്‍ഡറി സ്‌കൂളില്‍ താത്‌കാലിക അധ്യാപികയായി സേവനമനുഷ്‌ഠിക്കാന്‍ അവസരമൊരുക്കുകയായിരുന്നു. രണ്ട് വിഷയങ്ങളില്‍ ബിരുദാനന്തര ബിരുദവും എംഎഡുമുണ്ട് അനീറയ്‌ക്ക്.
ചെര്‍പ്പുളശേരി ഗവണ്‍മെന്‍റ് സ്‌കൂളില്‍ ജോലി ചെയ്‌തു കൊണ്ടിരിക്കെയാണ് ഹോമിയോപ്പതി മെഡിക്കല്‍ കോളജില്‍ വനിത ഹൗസ് കീപ്പര്‍ തസ്‌കയിലേക്ക് പിഎസ്‌സി അപേക്ഷ ക്ഷണിച്ചത്. അതില്‍ അനീറയും അപേക്ഷ സമര്‍പ്പിച്ചു. 2022 ഡിസംബര്‍ 31ന് ഇറക്കിയ വിജ്ഞാപനത്തില്‍ വനിതകള്‍ മാത്രം അപേക്ഷ സമര്‍പ്പിച്ചാല്‍ മതിയെന്നായിരുന്നു നിര്‍ദേശം.
ഹോസ്റ്റലില്‍ താമസിക്കുന്നതിനെ കുറിച്ചും അപേക്ഷയില്‍ പറഞ്ഞിരുന്നു. ഓണ്‍ലൈനിലൂടെയാണ് അനീറ അപേക്ഷ സമര്‍പ്പിച്ചത്. അപേക്ഷയില്‍ ട്രാന്സ് വുമണ്‍ എന്ന കാറ്റഗറി ഇല്ലാത്തത് കൊണ്ട് അപേക്ഷ സ്വീകരിച്ചിരുന്നില്ല. ഇതിന് പിന്നാലെയാണ് ട്രാന്സ് ജെന്‍ഡേഴ്‌സിന്‍റെ അവകാശങ്ങള്‍ സംരക്ഷിക്കണമെന്ന് ചൂണ്ടിക്കാട്ടി അനീറ കേരള അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ചത്.
പരാതിക്കാരിയോട് നേരിട്ടെത്തി പിഎസ്‌സിയില്‍ അപേക്ഷ സമര്‍പ്പിക്കാന്‍ ട്രൈബ്യൂണല്‍ ഉത്തരവിട്ടു. എന്നാല്‍ ഈ ട്രൈബ്യൂണല്‍ ഉത്തരവിനെതിരെ പിഎസ്‌സി ഹൈക്കോടതിയെ സമീപിക്കുകയായിരുന്നു.
