എറണാകുളം: കൊറോണ വൈറസ് ബാധ തടയാൻ കേരളത്തിൽ സ്വീകരിച്ച മുന്നൊരുക്കങ്ങളിൽ കേന്ദ്രസംഘം തൃപ്തി അറിയിച്ചു. കേരളത്തിലെ വിവിധ ആശുപത്രിയിൽ നിരീക്ഷണത്തിൽ ഉണ്ടായിരുന്ന എട്ടുപേരിൽ രണ്ടുപേർക്ക് കൊറോണ വൈറസ് ഇല്ലെന്ന് സ്ഥിരീകരിച്ചു. രാവിലെ കൊച്ചിയിൽ എത്തിയ കേന്ദ്രത്തിൽ നിന്നുള്ള ആരോഗ്യ വകുപ്പിന്റെ പ്രത്യേക സംഘമാണ് കേരളത്തിലെ മുന്നൊരുക്കങ്ങൾ വിലയിരുത്തിയത്. കൊച്ചി വിമാനത്താവളത്തിലും എറണാകുളം മെഡിക്കൽ കോളജിലും ഒരുക്കിയ തയ്യാറെടുപ്പുകളിൽ കേന്ദ്ര സംഘം തൃപ്തി അറിയിച്ചു.
കൊച്ചിയിൽ കൊറോണ ബാധയെ തുടർന്ന് നീരിക്ഷണത്തിലായിരുന്ന രണ്ട് പേർക്ക് വൈറസ് ബാധയില്ലെന്ന് സ്ഥിരീകരിച്ചു. എറണാകുളം തിരുവനന്തപുരം, പത്തനംതിട്ട, ആലപ്പുഴ, തൃശൂർ, മലപ്പുറം ജില്ലകളിൽ ഓരോരുത്തർ ഇപ്പോഴും ആശുപത്രിയിൽ നിരീക്ഷണത്തിലാണ്. ചൈനയില്‍ നിന്നടക്കം തിരിച്ചെത്തിയ രോഗലക്ഷണങ്ങളില്ലാത്തവരെ വീടുകളിലും നീരീക്ഷണ വിധേയമാക്കുന്നുണ്ട്.
