എറണാകുളം: തൃശൂരിലെ റോഡ് ഷോയ്ക്ക് തൊട്ടുപിന്നാലെ കൊച്ചിയെ ആവേശത്തിലാക്കി പ്രധാനമന്ത്രി നരേന്ദ്ര മോദി വീണ്ടുമെത്തി. ഇന്ന് (16-01-2024) വൈകിട്ട് 7.40 ഓടെയാണ് കെപിസിസി ജംങ്ഷൻ നിന്നും തുറന്ന വാഹനത്തില്‍ പ്രധാനമന്ത്രിയുടെ റോഡ് ഷോ ആരംഭിച്ചത്. പ്രധാനമന്ത്രിയെ കാണാന്‍ വന്‍ ജനാവലിയാണ് റോഡിന് ഇരുവശവും കാത്ത് നിന്നത്.
പൂക്കളാല്‍ അലങ്കരിച്ച തുറന്ന വാഹനത്തിലെത്തിയ മോദിയെ പൂക്കള്‍ വിതറിയും കൈകള്‍ വീശിയും മുദ്രവാക്യം വിളിച്ചും ബിജെപി പ്രവര്‍ത്തകര്‍ സ്വീകരിച്ചു. റോഡിന് ഇരുവശവും അണിനിരന്നവരെ പ്രധാനമന്ത്രി തിരിച്ചും അഭിവാദ്യം ചെയ്‌തു. ബിജെപി സംസ്ഥാന പ്രസിഡന്‍റ് കെ.സുരേന്ദ്രനും പ്രധാനമന്ത്രിക്കൊപ്പം തുറന്ന വാഹനത്തിലുണ്ടായിരുന്നു.
ആയിരകണക്കിന് ബിജെപി പ്രവര്‍ത്തകരാണ് റോഡ് ഷോ കാണാനെത്തിയത്. വൈകിട്ട് ആറരയോടെ നെടുമ്പാശ്ശേരിയിലിറങ്ങിയ നരേന്ദ്ര മോദി ഏഴേകാലോടെയാണ് കൊച്ചിയിലെത്തിയത്. കെപിസിസി ജംങ്ഷൻ മുതൽ ഗസ്റ്റ് ഹൗസ് വരെയുള്ള ഒന്നേകാൽ കിലോമീറ്ററാണ് പ്രധാനമന്ത്രി റോഡ് ഷോ നടത്തിയത്. റോഡിന് ഇരുവശവുത്തുമായിസ്ഥാപിച്ച ബാരിക്കേഡിന് പുറത്തായിട്ടാണ് പ്രവര്‍ത്തകര്‍ റോഡ് ഷോയെ സ്വീകരിക്കാനായി കാത്ത് നിന്നത്. രാത്രി 8.10ഓടെ റോഡ് ഷോ ഗസ്റ്റ് ഹൗസിന് മുന്നില്‍ സമാപിച്ചു.
നെടുമ്പാശ്ശേരി വിമാനത്താവളത്തിലെത്തിയ പ്രധാനമന്ത്രിക്ക് ഗവര്‍ണര്‍ ആരിഫ് മുഹമ്മദ് ഖാന്‍, മുഖ്യമന്ത്രി പിണറായി വിജയന്‍ എന്നിവരുടെ നേതൃത്വത്തിൽ ഊഷ്‌മള സ്വീകരണമാണ് നൽകിയത്. വൈകിട്ട് 6.50 ഓടെയാണ് പ്രധാനമന്ത്രി കൊച്ചി വിമാനത്താവളത്തിലെത്തിയത്. കേന്ദ്രമന്ത്രി വി. മുരളീധരന്‍ അടക്കം നിരവധി നേതാക്കളും രാഷ്‌ട്രീയ പ്രവര്‍ത്തകരും വിമാനത്താവളത്തില്‍ പ്രധാനമന്ത്രിയെ സ്വീകരിക്കാന്‍ എത്തിയിരുന്നു.
രണ്ട് ദിവസത്തെ സന്ദര്‍ശനത്തിനായാണ് പ്രധാന മന്ത്രി കേരളത്തില്‍ എത്തിയത്. കൊച്ചിയിലും തൃശൂരും നിരവധി പരിപാടികളില്‍ അദ്ദേഹം പങ്കെടുക്കും. നാളെ (ജനുവരി 17) രാവിലെ ഗുരുവായൂരിലെത്തുന്ന പ്രധാനമന്ത്രി ആദ്യം ക്ഷേത്ര ദർശനം നടത്തും. തുടർന്ന് 8.45ന് സുരേഷ് ഗോപിയുടെ മകളുടെ വിവാഹത്തിൽ പങ്കെടുക്കും. 9.45ന് തൃപ്രയാർ ക്ഷേത്രം സന്ദര്‍ശിക്കും തുടര്‍ന്ന് കൊച്ചിയിലേക്ക് യാത്ര തിരിക്കും.
നാളെ (ജനുവരി 17) ഉച്ചയ്ക്ക് 12 മണിക്ക് വെല്ലിങ്ടൺ ഐലന്‍റിൽ കൊച്ചിൻ ഷിപ്‌യാർഡിന്‍റെ പരിപാടിയിലും അദ്ദേഹം പങ്കെടുക്കും. തുടര്‍ന്ന് മൂന്ന് വന്‍കിട പദ്ധതികള്‍ അദ്ദേഹം രാജ്യത്തിന് സമര്‍പ്പിക്കും. കൊച്ചിൻ ഷിപ്‌യാര്‍ഡ് ലിമിറ്റഡിന്‍റെ ന്യൂ ഡ്രൈ ഡോക്ക്, ഇന്‍റർ നാഷണൽ ഷിപ്പ് റിപ്പയർ ഫെസിലിറ്റി, ഐഒസിയുടെ എൽപിജി ഇംപോർട്ട് ടെർമിനൽ തുടങ്ങി 4000 കോടിയുടെ പദ്ധതികളാണ് നാളെ ഉദ്‌ഘാടനം ചെയ്യുക. ഉച്ചയ്ക്ക് 1.30 ഓടെ കൊച്ചി മറൈൻ ഡ്രൈവിൽ എത്തുന്ന നരേന്ദ്ര മോദി ബിജെപി സംഘടിപ്പിക്കുന്ന പരിപാടിയിൽ പങ്കെടുക്കും. തുടര്‍ന്ന് 3.30 ഓടെ നെടുമ്പാശേരിയില്‍ നിന്നും ഡല്‍ഹിയിലേക്ക് മടങ്ങും.
