എറണാകുളം: കോതമംഗലത്തിന്റെ നെല്ലറയെന്ന് അറിയപ്പെട്ടിരുന്ന ഇടനാട് പാടശേഖരത്തിൽ കാലങ്ങള്‍ക്ക് ശേഷം നെല്‍കൃഷി ആരംഭിച്ചു. നെല്ലിക്കുഴി യുഗദീപ്തി ഗ്രന്ഥശാലയുടെ നേതൃത്വത്തിലാണ് പാടത്ത് നെൽകൃഷി തുടങ്ങിയിരിക്കുന്നത്. 100 ഏക്കറിലധികം വിസ്തീർണത്തിൽ വ്യാപിച്ചു കിടന്ന പാടശേഖരമായിരുന്നു ഇടനാട് പാടശേഖരം. നെൽകൃഷി പ്രതിസന്ധിയിലായതോടെ കർഷകർ മറ്റു കൃഷിയിലേക്ക് തിരിയുകയായിരുന്നു. ചിലർ കൃഷി പാടെ ഉപേക്ഷിക്കുകയും ചെയ്തു. ഇതോടെ പാടശേഖരത്തിന്റെ ഭൂരിഭാഗം പ്രദേശങ്ങളും തരിശുഭൂമിയായി.
നെല്‍കൃഷിക്കൊരുങ്ങി ഇടനാട് പാടശേഖരം ഇത്തരമൊരു പ്രതിസന്ധി ഘട്ടത്തിലാണ് കർഷക കൂട്ടായ്മകളുടെയും നെല്ലിക്കുഴി കൃഷിഭവന്റെയും സഹകരണത്തോടെ യുഗദീപ്തി ഗ്രന്ഥശാല നെൽകൃഷി ചെയ്യാൻ രംഗത്തുവന്നിരിക്കുന്നത്. വർഷങ്ങളായി തരിശുകിടന്ന രണ്ടേക്കർ സ്ഥലം ഉഴുതുമറിച്ചാണ് സംഘം ഞാറ് നട്ടത്. ഇടനാട് പാടശേഖരത്തിന്റെ പ്രതാപം തിരികെ കൊണ്ടുവന്ന് പ്രദേശവാസികളെ നെൽകൃഷിയിലേക്ക് വീണ്ടും തിരികെയെത്തിക്കുക എന്ന ലക്ഷ്യമാണ് യുഗദീപ്തി ഗ്രന്ഥശാലയ്ക്കുള്ളത്. നാടൻപാട്ടുകളുടെ അകമ്പടിയോടെ നടന്ന ഞാറു നടീൽ ഉത്സവം കോതമംഗലം ബ്ലോക്ക് പഞ്ചായത്ത് പ്രസിഡന്‍റ് റഷീദ സലിം ഉദ്ഘാടനം ചെയ്തു. ജനപ്രതിനിധികൾ, കൃഷി ഉദ്യോഗസ്ഥർ, കർഷകർ തുടങ്ങിയവർ നടീൽ ഉത്സവത്തിൽ പങ്കെടുത്തു.
