എറണാകുളം: സാമൂഹ്യ മാധ്യമങ്ങള്‍ വഴി പ്രായപൂര്‍ത്തിയാകാത്ത പെണ്‍കുട്ടിയെ കഞ്ചാവ് വലിക്കാന്‍ പ്രേരിപ്പിച്ചതിന് യൂട്യൂബ് വ്ലോഗര്‍ അറസ്റ്റില്‍. മട്ടാഞ്ചേരി സ്വദേശി ഫ്രാന്‍സിസ് നെവിന്‍ അഗസ്റ്റിനെയാണ് എക്സൈസ് സംഘം അറസ്റ്റ് ചെയ്തത്. പെണ്‍കുട്ടിയും വ്‌ളോഗറും തമ്മിലുള്ള വീഡിയോ ചാറ്റ് കഴിഞ്ഞ ദിവസങ്ങളില്‍ സോഷ്യല്‍മീഡിയയില്‍ പ്രചരിച്ചിരുന്നു.
ഇതിന് പിന്നാലെയാണ് എക്സൈസ് സംഭവത്തെക്കുറിച്ച് അന്വേഷണം തുടങ്ങിയത്. സൈബര്‍ സെല്ലിന്റെ സഹായത്തോടെയാണ് പ്രതിയെ എക്സൈസ് കണ്ടെത്തിയത്. തുടര്‍ന്ന് മട്ടാഞ്ചേരിയിലെ വീട്ടിലെത്തി പരിശോധന നടത്തുകയുx ഇയാളെ കസ്റ്റഡിയിലെടുക്കുകയായിരുന്നു.
വിശദമായ പരിശോധനയില്‍ ഇയാള്‍ കൈവശം സൂക്ഷിച്ചിരുന്ന കഞ്ചാവും എക്സൈസ് പിടിച്ചെടുത്തു. യൂട്യൂബ് വ്ലോഗറും പ്രായപൂർത്തിയാകാത്ത പെൺകുട്ടിയും തമ്മിലുള്ള സംഭാഷണ ദൃശ്യം പുറത്തായതിന് പിന്നാലെ കാട്ടൂർ പൊലീസും കേസ് രജിസ്റ്റർ ചെയ്തിരുന്നു. പെണ്‍കുട്ടിയെ കഞ്ചാവ് ഉപയോഗിക്കാന്‍ പ്രേരിപ്പിക്കുന്ന ദൃശ്യം പ്രചരിപ്പിച്ചവര്‍ക്കെതിരെയും എക്സൈസ് കേസെടുത്തിട്ടുണ്ട്.
ഇവർക്കെതിരെയും എക്സൈസ് നിയമ നടപടി സ്വീകരിക്കും. ഇതുമായി ബന്ധപ്പെട്ട് കൂടുതൽ അറസ്റ്റിലാകുമെന്നാണ് എക്സൈസ് നൽകുന്ന വിവരം.
