എറണാകുളം: പല്ലാരിമംഗലം പഞ്ചായത്തിലെ മിലാൻ ക്ലബിന്റെ നേതൃത്വത്തിൽ വടക്കൻ ജില്ലകളിലെ കുടുംബങ്ങൾക്ക് അവശ്യവസ്തുക്കളുടെ സമാഹരണം ആരംഭിച്ചു. ഗ്രാമ പഞ്ചായത്ത് അംഗം അമീൻ തടത്തിക്കുന്നേലിൽ നിന്നും ആദ്യ സഹായധനം ഏറ്റുവാങ്ങി. കോതമംഗലം എംഎൽഎ ആന്‍റണി ജോൺ ഉദ്ഘാടനം നിർവഹിച്ചു.
ചെറുതും വലുതുമായ സഹായങ്ങളുമായി നിരവധി നാട്ടുകാർ ഉദ്യമത്തിൽ സഹകരിച്ചു. അംഗൻവാടി കുട്ടികളും ബഡ്സ് സ്കൂൾ കുട്ടികളും ശേഖരിച്ച വസ്തുക്കളും ക്ലബ്ബിലേക്ക് കൈമാറി. വ്യാഴം, വെള്ളി, ശനി ദിവസങ്ങളിൽ ശേഖരണം നടത്തി ലഭിക്കുന്ന വസ്തുക്കൾ ഞായറാഴ്ചയോടെ അർഹതപ്പെട്ടവരിൽ എത്തിക്കുകയാണ് ഉദ്ദേശിക്കുന്നതെന്ന് ക്ലബ്ബ് സെക്രട്ടറി അനസ് കെ ബി പറഞ്ഞു.
പല്ലാരിമംഗലം പഞ്ചായത്ത് പ്രസിഡന്റ് പി കെ മൊയ്തു മുഖ്യ പ്രഭാഷണം നടത്തി. ചടങ്ങിൽ ക്ലബ്ബ് വൈസ് പ്രസിഡന്റ് ബിന്നി കെ. ജോസ് അധ്യക്ഷത വഹിച്ചു. ക്ലബ്ബ് സെക്രട്ടറി കെ ബി അനസ് സ്വാഗതം ആശംസിച്ചു. എക്സിക്യൂട്ടീവ് അംഗം ഇബ്രാഹിം കുട്ടി കൃതജ്ഞത രേഖപ്പെടുത്തി.
