എറണാകുളം: കുട്ടികളുടെ സമഗ്ര വികസനം ലക്ഷ്യമാക്കിയുള്ള 'ശാസ്ത്രീയ ലീഡ് പ്രീ-സ്കൂൾ'. പദ്ധതിയുടെ ഒത്തുചേരല്‍ വെണ്ടു വഴി സർക്കാർ എൽ.പി സ്‌കൂളില്‍ നടന്നു. പരിപാടി പ്രീ സ്കൂൾ കുട്ടികളെ ചെണ്ട അഭ്യസിപ്പിച്ച് ആന്റണി ജോൺ എം.എൽ.എ ഉദ്ഘാടനം ചെയ്തു. മന:ശാസ്ത്രത്തിലൂന്നിയ നൂതന ബോധരീതിശാസ്ത്രമാണ് ഈ പഠനരീതിയുടെ പ്രത്യേകത.
കഴിഞ്ഞ മൂന്നു വർഷമായി ഈ മാതൃക വിജയകരമായി പിന്തുടരുന്ന വിദ്യാലയമാണ് വെണ്ടു വഴി സർക്കാർ എൽ.പി സ്കൂൾ. ഓരോ വർഷവും ഇവിടെ പ്രീ-സ്കൂൾ പ്രവേശനം വർധിച്ച് വരികയാണ്. 130 പ്രീ-സ്കൂൾ കുട്ടികളാണ് ഈ അധ്യയനവര്‍ഷം സ്‌കൂളില്‍ പഠിക്കുന്നത്. ജില്ലയിലെ ഏറ്റവും മികച്ച അക്കാദമിക മികവു പുലർത്തുന്ന സ്കൂളിലെ പ്രവർത്തനങ്ങൾ നേരിട്ട് പഠിക്കുന്നതിനായി വിവിധ വിദ്യാലയങ്ങളില്‍ നിന്ന് പ്രഥമധ്യാപകരും പി.ടി.എ അധ്യക്ഷന്‍മാരും മാതൃസംഘം അധ്യക്ഷന്‍മാരും ജനപ്രതിനിധികളും പ്രീ സ്കൂൾ അധ്യാപകരും വെണ്ടുവഴി സ്കൂളിൽ ഒത്തുചേർന്നു.
ശിശുക്കളുടെ ശാരീരിക മാനസിക ഭൗതിക സർഗാത്മക കായിക വികാസത്തെ ലക്ഷ്യമാക്കി പൊതു വിദ്യാഭ്യാസ വകുപ്പും സമഗ്ര ശിക്ഷാ പ്രൊജക്ടും സംയുക്തമായി മാതൃഭാഷ മാധ്യമമായി നടപ്പാക്കുന്ന നൂതന പദ്ധതിയാണ് ശാസ്ത്രീയ ലീഡ് പ്രീ-സ്കൂൾ.
സ്‌കൂളില്‍ കുട്ടികള്‍ക്കായി കളിമൂല, അഭിനയമൂല,വായന മൂല ,ചിത്രമൂല,ശാസ്ത്ര മൂല,ഗണിതമൂല,കിഡ്സ് അത്ലറ്റിക്‌സ് മൂല,ജൈവ വൈവിധ്യ മൂല,റേഡിയോ മൂല എന്നിങ്ങനെ വിവിധ പഠന മൂലകൾ 800 ചതുരശ്ര അടി വിസ്‌തീർണമുള്ള ക്ലാസ് മുറിയിൽ സജ്ജീകരിച്ചിരിക്കുന്നു.
ചടങ്ങിൽ നഗരസഭ അധ്യക്ഷ മഞ്ജു സിജു അധ്യക്ഷയായി. സമഗ്ര ശിക്ഷാ ജില്ല പ്രൊജക്ട് ഓഫീസർ ഉഷ മാനാട്ട് സ്വാഗതം പറഞ്ഞു. സ്കൂൾ ഹരിത ചട്ടപ്രഖ്യാപനം നഗരസഭ വൈസ് ചെയർമാൻ എ.ജി.ജോർജ് നിർവ്വഹിച്ചു. വിവിധ അക്കാദമിക മൂലകളുടെ ഉദ്ഘാടനം പഞ്ചായത്ത് പ്രസിഡന്‍റും നിർവ്വഹിച്ചു.
