എറണാകുളം : കൊടകര കുഴൽപ്പണ കേസിൽ ഇ.ഡി അന്വേഷണം ആവശ്യപ്പെട്ട് സമർപ്പിച്ച ഹർജിയിൽ വിശദീകരണത്തിന് ഹൈക്കോടതിയിൽ വീണ്ടും സാവകാശം തേടി എന്‍ഫോഴ്സ്മെന്‍റ് ഡയറക്ടറേറ്റ്. മറുപടി നൽകാൻ കൂടുതൽ സമയം വേണമെന്ന് ഇ.ഡി കോടതിയോട് ആവശ്യപ്പെട്ടു.
ഇതേതുടർന്ന് വിശദമായ സത്യവാങ്മൂലം സമർപ്പിക്കാൻ ഹൈക്കോടതി രണ്ടാഴ്ചത്തെ സമയം അനുവദിച്ചു. നേരത്തെ പത്ത് ദിവസത്തിനകം വിശദീകരണം നൽകണമെന്ന് ഹൈക്കോടതി നിർദേശിച്ചിരുന്നു.
ALSO READ: മുട്ടിൽ മരംമുറി കേസ്: പ്രതികളുടെ മുൻകൂർ ജാമ്യാപേക്ഷ എതിർത്ത് സർക്കാർ
ലോക് താന്ത്രിക് യുവ ജനതാദൾ നേതാവ് സലീം മടവൂരാണ് കുഴൽപ്പണക്കേസിൽ ഇ.ഡി അന്വേഷണമാവശ്യപ്പെട്ട് ഹൈക്കോടതിയെ സമീപിച്ചത്. ബി.ജെ.പി നേതാക്കൾ ഉൾപ്പെട്ട കേസ് ഇ.ഡി അന്വേഷിക്കുന്നില്ലെന്നും നിരവധി തവണ പരാതി നൽകിയെങ്കിലും പരിഗണിച്ചില്ലെന്നുമാണ് ഹർജിക്കാരൻ അറിയിച്ചത്.
ഇഡി അന്വേഷണത്തിന് ഉത്തരവിടണമെന്നാണ് ഹർജിയിലെ ആവശ്യം. ഇ.ഡി ഡയറക്ടറെ എതിർകക്ഷിയാക്കിയാണ് ഹർജി സമർപ്പിച്ചത്.
