എറണാകുളം : ദേശീയ തലത്തിലുള്ള പുരസ്‌കാര നേട്ടത്തിൽ കൊച്ചി മെട്രോയും വാട്ടർ മെട്രോയും (Kochi Metro Bags Urban Infra Business Leadership Award). 2023 ലെ അർബൻ ഇൻഫ്ര ബിസിനസ് ലീഡർഷിപ്പ് അവാർഡ് ആണ് കൊച്ചി മെട്രോയും വാട്ടർ മെട്രോയും കരസ്ഥമാക്കിയത്. ഓപ്പറേഷൻസ് വിഭാഗത്തിന്‍റെ മികച്ച പ്രവർത്തനത്തിനാണ് കൊച്ചി മെട്രോ റെയിൽ ലിമിറ്റഡ് (Kochi Metro Rail Limited) പുരസ്‌കാരത്തിന് അവർഹരായത്. യാത്രക്കാരുടെ എണ്ണം വർധിപ്പിക്കുന്നതിനായി നടപ്പിലാക്കിയ പദ്ധതികൾ, ഡിജിറ്റലൈസേഷനു വേണ്ടി ചെയ്‌ത നടപടികൾ എന്നിവയും കൊച്ചി മെട്രോയെ പുരസ്‌കാരത്തിന് തെരഞ്ഞെടുക്കാന്‍ പരിഗണിച്ചു.
ജലഗതാഗത രംഗത്തെ നൂതന സംവിധാനം എന്ന വിഭാഗത്തിലാണ് കൊച്ചി വാട്ടർ മെട്രോ (Kochi Water Metro) അവാർഡിന് അർഹമായത്. കൊച്ചിയിലെ വിവിധ ദ്വീപുകളെ ബന്ധിപ്പിക്കുന്ന വാട്ടർ മെട്രോ മാതൃകാപരമായ പദ്ധതിയാണെന്ന് അവാർഡ് നിർണയ കമ്മിറ്റി വിലയിരുത്തി. ഡല്‍ഹിയിലെ ഇന്ത്യ ഇന്‍റർണാഷണൽ സെന്‍ററിൽ നടന്ന ചടങ്ങിൽ കൊച്ചി മെട്രോയ്ക്ക് വേണ്ടി കെഎംആർഎൽ ചീഫ് ജനറൽ മാനേജർ എ മണികണ്‌ഠൻ പുരസ്‌കാരം ഏറ്റുവാങ്ങി.
അതേസമയം കൊച്ചി മെട്രോയുടെ ആദ്യഘട്ടത്തിലെ അവസാന ഭാഗത്തെ ജോലികൾ അന്തിമ ഘട്ടത്തിലെത്തി. എസ് എൻ ജങ്ഷനിൽ നിന്ന് തൃപ്പൂണിത്തുറ സ്റ്റേഷൻ വരെ 1.18 കിലോമീറ്ററിന്‍റെ നിർമാണമാണ് നിലവിൽ അവസാന ഘട്ടത്തിലെത്തിയിരിക്കുന്നത്. സ്റ്റേഷന്‍റെയും വയഡക്റ്റിന്‍റെയും നിർമാണം പൂർത്തിയായി. സിഗ്നലിങ്, ടെലികോം, ട്രാക്ഷൻ ജോലികളും പൂർത്തിയായിക്കഴിഞ്ഞു. ഇവയുടെ ട്രയൽ റൺ ഉടൻ ആരംഭിക്കും.
