എറണാകുളം: കിഴക്കമ്പലത്ത് 2021 ലെ ക്രിസ്‌മസ് രാത്രിയില്‍ കിറ്റക്‌സ് കമ്പനിയിലെ അതിഥി തൊഴിലാളികൾ പൊലീസിനെ ആക്രമിക്കുകയും ഔദ്യോഗിക വാഹന തകർക്കുകയും ചെയ്‌ത കേസില്‍ കുറ്റപത്രം സമര്‍പ്പിച്ചു. 175 പേര്‍ക്കെതിരെ 524 പേജ് ഉള്‍പ്പെട്ടതാണ് കുറ്റപത്രം. കോലഞ്ചേരി ജുഡീഷ്വൽ ഫസ്റ്റ് ക്ലാസ്സ്‌ മജിസ്ട്രേറ്റ് കോടതിയിലാണ് സമര്‍പ്പിച്ചത്.
പ്രതികൾ ജാർഖണ്ഡ്, നാഗാലാന്‍ഡ്, അസം, ഉത്തർപ്രദേശ് എന്നിവടങ്ങളില്‍ നിന്നുള്ളവരാണ്. നിയമ വിരുദ്ധമായി സംഘം ചേർന്ന് കലാപം നടത്തൽ, മാരകായുധങ്ങൾ കൈവശം വയ്ക്കൽ, പൊതുമുതൽ നശിപ്പിക്കൽ, സർക്കാർ ഉദ്യോഗസ്ഥരുടെ ഔദ്യോഗിക കൃത്യനിർവഹണം തടസപ്പെടുത്തൽ എന്നീ വകുപ്പകളാണ് പ്രതികള്‍ക്കെതിരെ ചുമത്തിയത്.
ജില്ല പൊലീസ് മേധാവി കെ കാർത്തിക്കിന്‍റെ നേതൃത്വത്തിലുള്ള പ്രത്യേക അന്വേഷസംഘത്തില്‍ പെരുമ്പാവൂർ എ.എസ്.പി അനുജ് പലിവാല്‍, ഇന്‍സ്‌പെക്‌ടര്‍ കെ.ജെ പീറ്റര്‍ എന്നിവരടക്കം 19 പേരുണ്ടായിരുന്നു. നിരവധി പേര്‍ ഉള്‍പ്പെട്ടിട്ടുള്ള കേസില്‍ രണ്ട് മാസത്തിനകം കുറ്റപത്രം സമര്‍പ്പിക്കാന്‍ കഴിഞ്ഞത് അന്വേഷണ സംഘത്തിന്‍റെ നേട്ടമാണ്.
