എറണാകുളം : കരുവന്നൂർ ബാങ്ക് തട്ടിപ്പ് കേസിൽ (Karuvannur Bank Scam) ചോദ്യം ചെയ്യാൻ വിളിപ്പിച്ച് മർദിച്ചെന്ന പരാതിയിൽ എൻഫോഴ്സ്മെന്‍റ് ഡയറക്‌ടറേറ്റ് ഉദ്യോഗസ്ഥർക്ക് എതിരെ (ഇഡി) അന്വേഷണവുമായി പൊലീസ് (Kerala police against ED on Karuvannur bank scam). സിപിഎം പ്രാദേശിക നേതാവും വടക്കാഞ്ചേരി നഗരസഭ കൗൺസിലറുമായ പി ആർ അരവിന്ദാക്ഷന്‍റെ പരാതിയിലാണ് പൊലീസ് പ്രാഥമിക പരിശോധന തുടങ്ങിയത്. എറണാകുളം സെൻട്രൽ പൊലീസ് കൊച്ചിയിലെ ഇഡി ഓഫിസിലെത്തി വിവരങ്ങൾ തേടി.
കരുവന്നൂർ കേസിൽ ചോദ്യം ചെയ്യലിനായി വിളിപ്പിച്ച് ഇഡി (ED) ഉദ്യോഗസ്ഥർ തന്നെ മർദിച്ചുവെന്നാണ് പി ആർ അരവിന്ദാക്ഷൻ എറണാകുളം സെൻട്രൽ പൊലീസിൽ നൽകിയ പരാതിയിൽ ആരോപിക്കുന്നത്. 'പല തവണ തന്നെ മൊഴിയെടുക്കാൻ ഇഡി വിളിപ്പിച്ചിരുന്നു. അന്വേഷണവുമായി സഹകരിച്ച തന്നെ, കഴിഞ്ഞ ദിവസം അവർ പറയുന്നതിന് അനുസരിച്ച് മൊഴി നൽകാത്തതിന്‍റെ പേരിൽ മർദിക്കുകയായിരുന്നു'.
ഇതേ തുടർന്ന് ചികിത്സ തേടിയതായും തന്നെ മർദിച്ച ഉദ്യോഗസ്ഥർക്കെതിരെ നടപടിയെടുക്കണമെന്നാണ് പരാതിയിൽ ആവശ്യപ്പെടുന്നത്. മർദിച്ച ഉദ്യോഗസ്ഥരുടെ പേര് വിവരങ്ങൾ ഉൾപ്പടെ പരാതിയിൽ സൂചിപിക്കുന്നുണ്ട്. ഇതേ തുടർന്നാണ് എഫ് ഐ ആർ റജിസ്റ്റർ ചെയ്യുന്നതിന്‍റെ മുന്നോടിയായി ഇഡി ഓഫിസിലെത്തി പൊലീസ് പ്രാഥമിക പരിശോധന നടത്തിയത്.
അന്വേഷണം കേന്ദ്ര ഏജൻസിക്കെതിരെ ആയതിനാൽ നിയമോപദേശം തേടിയായിരിക്കും പൊലീസ് തുടർ നടപടികളിലേക്ക് പ്രവേശിക്കുക. അതേസമയം ഈ പരാതിയിൽ പൊലീസ് ഇഡി ഉദ്യോഗസ്ഥർക്കെതിരെ കേസെടുത്താൽ സംസ്ഥാന പൊലീസും കേന്ദ്ര ഏജൻസിയും തമ്മിൽ നേരിട്ടുള്ള ഏറ്റുമുട്ടലിലേക്കായിരിക്കും കാര്യങ്ങൾ നീങ്ങുക. നിലവിലെ സാഹചര്യത്തിൽ പൊലീസ് തുടർ നടപടികൾ സ്വീകരിച്ചാൽ ഇഡി കോടതിയെ സമീപിക്കാനാണ് സാധ്യത.
സ്വർണക്കടത്ത് കേസിൽ സംസ്ഥാനവും കേന്ദ്ര ഏജൻസിയും തമ്മിൽ നേരിട്ട് ഏറ്റുമുട്ടിയപ്പോൾ സർക്കാർ ഇഡിക്കെതിരെ ജുഡീഷ്യൽ അന്വേഷണം പ്രഖ്യാപിച്ചിരുന്നു. എന്നാൽ ഇതിനെതിരെ ഇഡി ഹൈക്കോടതിയെ സമീപിച്ച് അനുകൂല വിധി നേടിയിരുന്നു. ഇതോടെയാണ് ഈ വിവാദത്തിന് തിരശ്ശീല വീണത്. സമാനമായ സാഹചര്യമാണ് കരുവന്നൂർ ബാങ്ക് തട്ടിപ്പ് കേസിലും രൂപപ്പെട്ട് വരുന്നത്.
