എറണാകുളം: മുഖ്യമന്ത്രി പിണറായി വിജയനെതിരെ (CM Pinarayai Vijayan) പരിഹാസവുമായി കെപിസിസി (KPCC) അധ്യക്ഷന്‍ കെ സുധാകരൻ (K Sudhakaran). മാസപ്പടി വിവാദത്തിൽ (Monthly Quota Controversy) പ്രതികരിക്കാതെ തനിക്കിതൊന്നും ബാധകമല്ലെന്ന രീതിയിലാണ് പിണറായി മുന്നോട്ട് പോകുന്നതെന്ന് അദ്ദേഹം പറഞ്ഞു. കൊച്ചിയിൽ മാധ്യമങ്ങളോട് സംസാരിക്കവെയാണ് സുധാകരന്‍ ഇക്കാര്യം വ്യക്തമാക്കിയത്.
'ഒരു അപൂർവ ജീവിയാണ് പിണാറായി വിജയൻ. അദ്ദേഹം ഏത് ലോകത്താണ് ജീവിക്കുന്നതെന്ന് എനിക്ക് അറിയില്ല. എന്ത് മുഖ്യമന്ത്രിയാണ് ഈ മനുഷ്യനെന്നും മനസിലാകുന്നില്ല. ഇത്തരത്തിൽ മൗനം പാലിച്ച് ഒരു നേതാവ് എല്ലാം മൂടിവയ്ക്കാ‌ൻ ശ്രമിക്കുന്നത് ആദ്യത്തെ അനുഭവമാണ്. കോൺഗ്രസും ബിജെപിയും തമ്മിൽ ധാരണയുള്ളത് കൊണ്ടാണല്ലോ പിണറായി അകത്ത് പോകാത്തത്'- സുധാകരന്‍ പരിഹസിച്ചു.
'ഒരു ഭാഗത്ത് ബിജെപി നേതാവിനെ കേരള പൊലീസ് സംരക്ഷിക്കുന്നു. മറുഭാഗത്ത് മുഖ്യമന്ത്രിയെ സംരക്ഷിക്കുന്നു. ഇതെല്ലാം ആർക്കാണ് അറിയാത്തതെന്നും' സുധാകരൻ ചോദിച്ചു.
'കരുവന്നൂർ ബാങ്ക് തട്ടിപ്പ് കേസിൽ സത്യസന്ധമായ കാര്യങ്ങൾ ഇ ഡി അന്വേഷണത്തിലൂടെ തെളിയട്ടെ. സിപിഎം ഇതുവരെ പറഞ്ഞതെല്ലാം ശരിയല്ലന്ന് ജനങ്ങൾ മനസിലാക്കും. വായ തുറന്നാൽ കളവ് പറഞ്ഞ് രക്ഷപ്പെടുകയെന്നതാണ് സിപിഎം നയം. പക്ഷെ ഇതിൽ കുടുങ്ങി പോയിരിക്കുകയാണ്. എ സി മൊയ്‌തീന്‍റെ കേസ് വ്യത്യസ്‌തമായ കേസാണ്. ഈ കേസിൽ അന്വേഷണ റിപ്പോർട്ട് പുറത്ത് വരട്ടെയെന്നും മറുപടി സിപിഎം പറയട്ടെയെന്നും' -കെ സുധാകരൻ വ്യക്തമാക്കി.
കരുവന്നൂര്‍ ബാങ്ക് തട്ടിപ്പ് കേസില്‍ വലിയ അഴിമതി Karuvanur Bank Scam Case: 'ഒരിക്കലും പ്രതീക്ഷിക്കാത്ത വലിയ അഴിമതിയാണ് നടന്നത്. നിഷേധിക്കാൻ സിപിഎമ്മിന് കഴിഞ്ഞിട്ടില്ല. അന്വേഷണവുമായി തന്നെ പോലെ സഹകരിക്കട്ടെ. മുപ്പതാം തീയതി തന്നെ ഇഡിക്ക് മുമ്പിൽ ഹാജറാകും' -കെ സുധാകരന്‍ കൂട്ടിച്ചേര്‍ത്തു.
'മോൺസൺ മാവുങ്കൽ പ്രതിയായ പോക്സോ കേസിൽ എം വി ഗോവിന്ദൻ നടത്തിയ വിവാദ ആരോപണം അപകീർത്തികരമാണെന്ന് ചൂണ്ടിക്കാണിച്ചാണ് മാന നഷ്ട്ടക്കേസ് ഫയൽ ചെയ്‌തത്. തനിക്കെതിരായി എം വി ഗോവിന്ദന്‍ നടത്തിയ പരമർശം ഗുരുതരമാണ്. താൻ ഒരിക്കലും സഹിക്കാത്ത അപമാനകരമായ പ്രസ്‌താവനയാണ് എം വി ഗോവിന്ദൻ നടത്തിയത്.
ജീവിതത്തിൽ ഒരിക്കലും പ്രതീക്ഷിക്കാത്ത ആരോപണമാണ് തനിക്കെതിരെ വന്നത്. ഇതിൽ വസ്‌തുതയില്ലെന്ന് തെളിയിക്കേണ്ടത് തന്‍റെ ബാധ്യതയാണ്. അത് നിറവേറ്റുന്നു എന്ന് മാത്രമാണുള്ളത്. എനിക്ക് അവരെ ശിക്ഷിക്കണമെന്നില്ലെന്നും തനിക്ക് ഇതിൽ പങ്കില്ലായെന്ന് തെളിയിക്കാനുള്ള അവസരമാണ് ഇതെന്നും' -കെ സുധാകരൻ കൊച്ചിയിൽ മാധ്യമങ്ങളോട് പറഞ്ഞു.
അതേസമയം, സിപിഎം സംസ്ഥാന സെക്രട്ടറിക്കെതിരായ അപകീർത്തി കേസിൽ പരാതിക്കാരനായ കെപിസിസി അധ്യക്ഷൻ കെ സുധാകരൻ മൂന്ന് മണിയോടെ കോടതിയിൽ ഹാജരായി മൊഴി നൽകും. എറണാകുളം ചീഫ് ജുഡീഷ്യൽ മജിസ്ട്രേറ്റ് കോടതിയിലാണ് മൊഴി നൽകുക. എം വി ഗോവിന്ദൻ, കണ്ണൂർ ജില്ല പഞ്ചായത്ത് പ്രസിഡൻ്റ് പി പി ദിവ്യ, ദേശാഭിമാനി ദിനപത്രം എന്നിവരാണ് സുധാകരൻ നൽകിയ മാനനഷ്‌ട കേസിലെ എതിർ കക്ഷികൾ.
കെ സുധാകരൻ നൽകിയ ഹർജി സിജെഎം കോടതി നേരത്തെ ഫയലിൽ സ്വീകരിച്ചിരുന്നു. ഇതേതുടർന്നാണ് കെ സുധാകരൻ സിജെഎം കോടതിയിൽ നേരിട്ട് ഹാജറായി മൊഴി നൽകുന്നത്.
