എറണാകുളം: ഹൈക്കോടതിയ്‌ക്കെതിരായ വിമർശനങ്ങൾ അനുവദിക്കാനാകില്ലെന്ന് ജസ്റ്റിസ് ദേവൻ രാമചന്ദ്രൻ. വ്യക്തിപരമായ വിമർശനങ്ങൾ കാര്യമാക്കില്ല. ഹൈക്കോടതിയ്ക്ക് കഴിവില്ലേ എന്ന വിമർശനം പലപ്പോഴും കേൾക്കേണ്ടി വരുന്നുവെന്നും അദ്ദേഹം പറഞ്ഞു.
കോടതിയ്ക്ക് എവിടെ നിന്നും പിന്തുണ ലഭിക്കുന്നില്ല. ബ്രേക്ക് ത്രൂ പദ്ധതിയിലെ സർക്കാരിന്‍റെ പിടിവാശി കാരണം വിഷയത്തിൽ ഇടപെടുന്നത് അവസാനിപ്പിക്കാമെന്നും ജസ്റ്റിസ് ദേവൻ രാമചന്ദ്രൻ വിമർശന സ്വരത്തിൽ പറഞ്ഞു. കൊച്ചി മുല്ലശ്ശേരി കനാൽ ശുചീകരണവുമായി ബന്ധപ്പെട്ട ഹർജി പരിഗണിക്കവെയാണ് കോടതി വിമർശനം.
കാനകളുടെ ശോചനീയാവസ്ഥയിൽ കടുത്ത അമര്‍ഷവും കോടതി രേഖപ്പെടുത്തി. ആരും കോടതി ഉത്തരവുകള്‍ അംഗീകരിക്കുന്നില്ലെന്നും കൊച്ചിയെ വിധിക്കു വിട്ടുകൊടുക്കാമെന്നും കോടതി നിരാശ സ്വരത്തിൽ പറഞ്ഞു. സര്‍ക്കാര്‍ വിഷയം അതീവ ഗൗരവമായി കാണണമെന്നും കോടതി ഓർമിപ്പിച്ചു.
