എറണാകുളം : മാർക്കറ്റ് ഫെഡ് എം.ഡിയായി സനിൽ എസ്.കെയെ നിയമിച്ച നടപടി ഹൈക്കോടതി റദ്ദാക്കി. ഡിവിഷൻ ബഞ്ചിന്‍റേതാണ് നടപടി. ചട്ടപ്രകാരമല്ല നിയമനമെന്ന് വിലയിരുത്തിയാണ് കോടതി ഉത്തരവ്.
ഐ.എ.എസ് ഉദ്യോഗസ്ഥനെയാകണം എം.ഡിയായി നിയമിക്കേണ്ടതെന്ന ചട്ടം ലംഘിച്ചുവെന്ന് ഉത്തരവിൽ ഹൈക്കോടതി ചൂണ്ടിക്കാട്ടി. 2018 ലാണ് സനിലിനെ മാർക്കറ്റ് ഫെഡ് എം.ഡിയായി നിയമിച്ചത്. നിയമന നടപടികളിൽ സർക്കാരും മാർക്കറ്റ് ഫെഡും വരുത്തിയ വീഴ്ചയില്‍ കോടതി അതൃപ്‌തി പ്രകടിപ്പിച്ചു.
സനിലിന്‍റെ നിയമനം ചോദ്യം ചെയ്‌തുള്ള ഹർജി നേരത്തെ സിംഗിൾ ബഞ്ച് തള്ളിയിരുന്നു. ഇതിനെതിരെ ഹർജിക്കാരനായ വയനാട് സ്വദേശി കൃഷ്‌ണൻ നൽകിയ അപ്പീൽ അനുവദിച്ചുകൊണ്ടാണ് സനിലിനെ എം.ഡി സ്ഥാനത്തുനിന്നും കോടതി നീക്കിയത്.
