എറണാകുളം: മതരഹിത ജീവിതം നയിക്കുന്നവർക്ക് സാമ്പത്തിക സംവരണത്തിന് അർഹതയുണ്ടെന്ന് ഹൈക്കോടതി. ഇത്തരക്കാർക്ക് മതരഹിതരെന്ന സർട്ടിഫിക്കറ്റ് നൽകണമെന്നും ഇതിനായി സർക്കാർ ഉടൻ നയങ്ങളും മാനദണ്ഡങ്ങളും കൊണ്ടുവരണമെന്നും കോടതി നിർദേശിച്ചു. മതരഹിതരായി ജീവിക്കുന്നവരിലെ പിന്നാക്ക വിഭാഗങ്ങൾക്ക് അവകാശം നഷ്‌ടമാകുന്നത് ചോദ്യം ചെയ്‌തുള്ള ഹർജിയിലാണ് ജസ്റ്റിസ് വിജി അരുണിന്‍റെ നിർണായക ഉത്തരവ്.
മതരഹിതരെന്ന സർട്ടിഫിക്കറ്റ് ലഭിക്കുന്നവരിൽ അർഹരായവർക്ക് 10% സാമ്പത്തിക സംവരണം നൽകണമെന്നും കോടതി വ്യക്തമാക്കി. ഇത് ഭരണഘടനാപരമായ അവകാശമാണെന്നും പുരോഗമനവാദികളെന്ന് അവകാശപ്പെടുന്ന സർക്കാരിന് ഒരിക്കലും നിഷേധിക്കാനാവില്ലെന്നും ഉത്തരവിലുണ്ട്.
