എറണാകുളം: പുലിപ്പേടിയിൽ ദിനരാത്രങ്ങൾ തള്ളി നീക്കുന്ന കോതമംഗലം പ്ലാമുടിക്കാർക്ക് ആശ്വാസമായി, പുലിയെ കുടുക്കാൻ കെണി തയാറാക്കി വനംവകുപ്പ്. ആനപ്പേടിയിൽ കഴിഞ്ഞിരുന്ന കോട്ടപ്പടി പഞ്ചായത്തിലെ പ്ലാമുടിക്കാർക്ക് ഒരാഴ്ചയായി പുലിപ്പേടിയും ഒഴിയാബാധയായിരിക്കുകയാണ്. കോഴികളെയും പട്ടികളെയും കൊന്ന് തിന്ന് കഴിഞ്ഞ രാത്രികളിൽ ഭീതി പടർത്തിയ പുലിയെ കുടുക്കാൻ മലയാറ്റൂരിൽ നിന്ന് കൊണ്ടുവന്ന കെണിയാണ് വനംവകുപ്പ് ഇവിടെ സ്ഥാപിച്ചത്.
ALSO READ: കോതമംഗലത്ത് പുലി വളര്‍ത്തുനായയെ കടിച്ചുകൊന്നു ; ആശങ്കയിൽ നാട്ടുകാർ
വനത്തിനോട് ചേർന്നുള്ള ജനവാസ മേഖലയിലെ റബ്ബർ തോട്ടത്തിലാണ് പുലിക്ക് വേണ്ടി കെണി ഒരുക്കിയിരിക്കുന്നത്. വീരോളി കാർത്ത്യായനി, മാണിക്കൽ കാർത്തിക എന്നിവരുടെ വീടുകളിൽ കഴിഞ്ഞ രാത്രി പുലി എത്തി പട്ടിയേയും കോഴികളെയും പിടിച്ചത് നാട്ടുകാരിൽ പരക്കെ ഭീതി പരത്തിയിരുന്നു.
നാട്ടുകാരുടെ ആശങ്കയകറ്റുന്നതിനുള്ള അടിയന്തര നടപടികളാണ് സ്വീകരിച്ചുവരുന്നതെന്നാണ് ആൻ്റണി ജോൺ എംഎൽഎയുടെ പ്രതികരണം. തെളിവുകൾ പരിശോധിച്ചതിൽ നിന്ന് പുലിയോ, പുലിക്ക് സമാനമായ വന്യ ജീവിയോ ആകാമെന്ന ഉറപ്പിലാണ് കെണി സ്ഥാപിക്കുന്നതെന്ന് ഡെപ്യൂട്ടി റേഞ്ച് ഓഫിസർ കെ.ആർ അജയൻ പറഞ്ഞു.
