എറണാകുളം: സഹകരണ വകുപ്പ് സംഘടിപ്പിക്കുന്ന എക്സ്പോ 2022 ന് കൊച്ചി മറൈന്‍ ഡ്രൈവില്‍ ഉജ്ജ്വല തുടക്കം. മട്ടന്നൂര്‍ ശങ്കരന്‍ കുട്ടിമാരാരുടെ ചെണ്ട മേളത്തോടെയാണ് 'ഒരുമയുടെ പൂരം' എന്ന് പേരിട്ടിരിക്കുന്ന സഹകരണ എക്‌സ്‌പോയ്‌ക് തുടക്കം കുറിച്ചത്. മുഖ്യമന്ത്രി പിണറായി വിജയൻ ഔപചാരിക ഉദ്ഘാടനകർമം ഓൺലൈനായി നിർവഹിച്ചു.
'സഹകരണ മേഖല കരുത്തോടെ മുന്നേറുന്നു': സഹകരണ മേഖലയ്ക്ക് എതിരായ നീക്കങ്ങളെ അതിജീവിച്ചത് കേരളത്തിലെ സഹകാരികളുടെ യോജിച്ചുനിന്നുള്ള ചെറുത്തുനിലപ്പ് കൊണ്ടാണെന് മുഖ്യമന്ത്രി പറഞ്ഞു. ജനനം മുതല്‍ മരണംവരെ ജനജീവിതവുമായി ബന്ധപ്പെട്ട എല്ലാമേഖലയിലും സഹകരണ സംഘങ്ങള്‍ സഹായവുമായി സജീവമാണ്. അതുകൊണ്ടുതന്നെ എല്ലാമേഖലയില്‍ നിന്നും സഹകരണ സംഘങ്ങള്‍ക്ക് ജനപിന്തുണ ലഭിക്കുന്നു.
കേരളത്തില്‍ മാറി വന്ന സര്‍ക്കാരുകള്‍ സഹകരണ മേഖലയെ സംരക്ഷിക്കുന്ന നിലപാടുകളാണ് സ്വീകരിച്ചത്. ഈ സര്‍ക്കാരും അതേ നിലപാടുതന്നെയാണ് സ്വീകരിക്കുന്നതെന്നും മുഖ്യമന്ത്രി പറഞ്ഞു. സമസ്‌ത മേഖലകളിലും കരുത്ത് തെളിയിച്ച് മുന്നേറുകയാണ് കേരളത്തിലെ സഹകരണ മേഖലയെന്ന് ചടങ്ങില്‍ അധ്യക്ഷത വഹിച്ച സഹകരണ വകുപ്പ് മന്ത്രി വി.എന്‍ വാസവന്‍ പറഞ്ഞു.
'മുപ്പതോളം മേഖലയില്‍ സഹകരണ സംരംഭം': കൊവിഡ് പ്രതിരോധ പ്രവര്‍ത്തനങ്ങളില്‍ നിര്‍ണായക പങ്കുവഹിച്ചു. ഓണ്‍ലൈന്‍ ക്ലാസുകള്‍ ആരംഭിച്ചപ്പോള്‍ മൊബൈല്‍ ഫോണും ടാബും വാങ്ങുന്നതിനായി പലിശ രഹിത വായ്‌പ നല്‍കി. കുടുംബശ്രീ മുഖേന മുറ്റത്തെ മുല്ല പദ്ധതി പ്രകാരം വായ്‌പകള്‍ അനുവദിച്ചു. യുവാക്കളെ ആകര്‍ഷിക്കുന്നതിന് മുപ്പതോളം മേഖലയില്‍ സഹകരണ സംരംഭങ്ങള്‍ക്ക് തുടക്കമിട്ടു.
കായിക മേഖലയിലും സഹകരണ മേഖല സജീവമാകുകയാണന്ന് മന്ത്രി ചൂണ്ടിക്കാണിച്ചു. എക്സ്പോയിലെ സ്റ്റാളുകളുടെ ഉദ്ഘാടനം വ്യവസായവകുപ്പ് മന്ത്രി പി രാജീവ് നിർവഹിച്ചു. സഹകരണ എക്സ്പോ പവലിയനില്‍ 210 സ്റ്റാളുകളാണുള്ളത്. സംസ്ഥാനത്തെ പ്രമുഖ സഹകരണ സ്ഥാപനങ്ങള്‍ അവരുടെ ഉത്‌പന്നങ്ങളും സേവനങ്ങളുമായി എക്സ്പോയില്‍ പങ്കെടുക്കുന്നു.
'രുചി വൈവിധ്യവുമായി വിശാലമായ ഫുഡ് കോര്‍ട്ട്': ദേശീയ, അന്തര്‍ ദേശീയ തലത്തില്‍ മികച്ച നേട്ടങ്ങള്‍ സൃഷ്‌ടിച്ച സംസ്ഥാനത്തെ സഹകരണ മേഖലയുടെ ചരിത്രം, ഏറ്റെടുത്ത വെല്ലുവിളികള്‍, നടത്തി വരുന്ന ജനകീയ പ്രവര്‍ത്തനങ്ങള്‍ എന്നിവയും സഹകരണ എക്സ്പോയിൽ പരിചയപ്പെടുത്തുന്നു. വിശാലമായ ഫുഡ് കോര്‍ട്ടില്‍ രുചി വൈവിധ്യങ്ങളും ഒരുക്കിയിട്ടുണ്ട്. എല്ലാ ജില്ലകളില്‍ നിന്നുള്ള സഹകാരികളും സഹകരണ സംഘം ഭരണസമിതി അംഗങ്ങളും ജീവനക്കാരും മേള കാണാനെത്തുന്നുണ്ട്.
ALSO READ | സഹകരണ മേഖലയുടെ സമഗ്ര മുന്നേറ്റം ലക്ഷ്യം ; എക്സ്പോ 2022 മുഖ്യമന്ത്രി ഉദ്ഘാടനം ചെയ്യും
സഹകരണ സംഘങ്ങളുടെ ഉത്‌പന്നങ്ങള്‍ ഡിസ്‌കൗണ്ട് നിരക്കില്‍ പൊതുജനങ്ങള്‍ക്ക് വാങ്ങാന്‍ അവസരമൊരുക്കിയിട്ടുണ്ട്. പ്രവേശനം പൂര്‍ണമായും സൗജന്യമാണ്. രാവിലെ 9.30 മുതല്‍ രാത്രി 8.30 വരെയാണ് പ്രദര്‍ശനം. ഏപ്രിൽ 25 ന് എക്സ്പോ സമാപിക്കും.
