ആലപ്പുഴ: കൊവിഡ് വ്യാപനത്തിന്‍റെ പശ്ചാത്തലത്തില്‍ ആലപ്പുഴ മെഡിക്കല്‍ കോളജിൽ നിര്‍ത്തിവെച്ചിരുന്ന സേവനങ്ങള്‍ സെപ്‌റ്റംബര്‍ 14 മുതല്‍ പുനരാരംഭിക്കുമെന്ന് മെഡിക്കല്‍ കോളജ് സൂപ്രണ്ട് അറിയിച്ചു. ഇതിന്‍റെ ഭാഗമായുള്ള ക്രമീകരണങ്ങള്‍ ഏര്‍പ്പെടുത്തിയെന്നും സൂപ്രണ്ട് പറഞ്ഞു.
രാവിലെ ഒമ്പത് മുതല്‍ രാവിലെ 11 വരെ മുമ്പ് ഉണ്ടായിരുന്ന എല്ലാ ഒ. പി കളും ഉണ്ടായിരിക്കുന്നതാണ്. അപകടത്തില്‍പെട്ട് വരുന്നവരുടെ ഓപ്പറേഷനും ക്യാന്‍സര്‍ രോഗികളുടെ ഓപ്പറേഷനും നേരത്തെ നിലനിന്നിരുന്ന സംവിധാനത്തില്‍ പുനരാരംഭിക്കും. കീമോതെറാപ്പി, റേഡിയോതെറാപ്പി, ഡയാലിസിസ് എന്നിവ നിയന്ത്രിതമായി പുനരാരംഭിക്കും. രോഗികള്‍ ടെലിഫോണിക് കണ്‍സള്‍ട്ടേഷന്‍ സൗകര്യം പരമാവധി പ്രയോജനപ്പെടുത്തണം. ഒ. പി, ലാബ്, ഫാര്‍മസി എന്നിവിടങ്ങളിലെല്ലാം കൃത്യമായ സാമൂഹിക അകലം പാലിക്കേണ്ടതാണെന്നും സൂപ്രണ്ട് വ്യക്തമാക്കി.
ആശുപത്രിയിലേക്ക് പ്രവേശിക്കുന്നതിനു മുന്‍പ് സോപ്പ് ഉപയോഗിച്ച് കൈകള്‍ കഴുകുകയും മാസ്‌ക് നിര്‍ബന്ധമായി ധരിക്കുകയും ചെയ്യേണ്ടതാണ്. ഒരു സ്ഥലത്തും കൂട്ടംകൂടി നില്‍ക്കുവാന്‍ അനുവദിക്കില്ല. പരിശോധന മുറിയില്‍ ഒരു സമയം ഒരു രോഗിയെ മാത്രമെ അനുവദിക്കൂ. ഒരു രോഗിയുടെ കൂടെ ഒരാളെ മാത്രമെ അനുവദിക്കൂ. കൂടാതെ രോഗി സന്ദര്‍ശനം കര്‍ശനമായി മെഡിക്കല്‍ കോളജില്‍ നിരോധിച്ചിരിക്കുകയാണ്.
തുടര്‍ച്ചയായി മരുന്നുകള്‍ കഴിക്കുന്നവര്‍ ബന്ധുക്കള്‍ മുഖാന്തരം ബുക്ക് /ചീട്ട് കൊടുത്തു വിട്ടാല്‍ രണ്ട് മാസത്തേക്ക് മരുന്നുകള്‍ നല്‍കും. മാനസിക രോഗത്തിനുള്ള മരുന്നുകള്‍ കഴിക്കുന്നവര്‍ ഡോക്‌ടറെ കാണിച്ച് കുറിപ്പടി പുതുക്കേണ്ടതാണ്. സാധാരണ മരുന്നുകള്‍ക്ക് ഇത് ബാധകമല്ലെന്നും അത്തരം മരുന്നുകള്‍ ഫാര്‍മസിയില്‍ നിന്ന് നേരിട്ട് വാങ്ങാവുന്നതാണെന്നും മെഡിക്കല്‍ സൂപ്രണ്ട് അറിയിച്ചു.
