ആലപ്പുഴ: മുൻമന്ത്രിയും കുട്ടനാട് എംഎൽഎയുമായ തോമസ് ചാണ്ടിയുടെ അനധികൃത കയ്യേറ്റങ്ങളും റിസോർട്ട് ഉൾപ്പെടെയുള്ള കെട്ടിടങ്ങളും ക്രമവത്കരിക്കാനുള്ള നടപടി അഴിമതിയും രാഷ്ട്രീയ പ്രേരിതവുമാണെന്ന് പ്രതിപക്ഷനേതാവ് രമേശ് ചെന്നിത്തല. ആലപ്പുഴയിൽ ഡിസിസി നേതൃയോഗത്തിന് എത്തിയപ്പോഴായിരുന്നു ചെന്നിത്തലയുടെ പ്രതികരണം. ആലപ്പുഴ നഗരസഭ നിശ്ചയിച്ച രണ്ട് കോടി 71 ലക്ഷം രൂപ എന്ന പിഴത്തുക സംസ്ഥാന സർക്കാർ ഇടപെട്ട് 35 ലക്ഷമായി കുറച്ചു. ഇത് രാഷ്ട്രീയ അഴിമതി ആണ്. നടപടി പുന:പരിശോധിക്കാന്‍ സര്‍ക്കാര്‍ തയ്യാറാകണം. അതേ സമയം പിഴത്തുക വെട്ടിക്കുറച്ചതില്‍ നിയമ നടപടികളുമായി മുന്നോട്ടുപോകുമെന്ന ആലപ്പുഴ നഗരസഭയുടെ നിലപാട് സ്വാഗതാർഹമാണെന്നും രമേശ് ചെന്നിത്തല പറഞ്ഞു.
പാലാരിവട്ടം പാലത്തിന്റെ കാര്യത്തിൽ സർക്കാരിന് അന്വേഷണം നടത്താവുന്നതാണ്. പാലത്തിന്റെ നിർമ്മാണവുമായി ബന്ധപ്പെട്ട കാര്യങ്ങൾ മുൻ മന്ത്രി ഇബ്രാഹിംകുഞ്ഞ് വ്യക്തമാക്കിയിട്ടുണ്ട്. സിഒടി നസീറിനെ കോൺഗ്രസിലേക്ക് എടുക്കുന്ന കാര്യം ഇപ്പോൾ ആലോചനയില്‍ ഇല്ലെന്നും അദ്ദേഹം വ്യക്തമാക്കി.
