ആലപ്പുഴ: സമഗ്ര കാർഷിക പരിഷ്‌കാരം നടപ്പാക്കിയതാണ് കേരളത്തിന്റെ ഉയർച്ചക്ക് അടിസ്ഥാനമെന്ന് ഭക്ഷ്യ മന്ത്രി പി.തിലോത്തമൻ. വിദ്യാഭ്യാസം, ആരോഗ്യം, കൃഷി തുടങ്ങി എല്ലാ മേഖലയിലും മറ്റ് സംസ്ഥാനങ്ങളേക്കാൾ മുന്നിലാണ് കേരളം. സർക്കാരിന്റെ ക്ഷേമ പദ്ധതികളും ആനുകൂല്യങ്ങളും എല്ലാവരിലേക്കും എത്തിക്കുക എന്ന ലക്ഷ്യം കൂടി കണക്കിലെടുത്താണ് ലൈഫ് മിഷൻ പോലുള്ള പദ്ധതികൾ സർക്കാർ നടപ്പാക്കുന്നതെന്നും മന്ത്രി പറഞ്ഞു. ചേർത്തല നഗരസഭയുടെ ലൈഫ് ഗുണഭോക്താക്കൾക്കു വേണ്ടിയുള്ള കുടുംബ സംഗമവും അദാലത്തും ഉദ്ഘാടനം ചെയ്യുകയായിരുന്നു അദ്ദേഹം. സ്വന്തമായി വീടെന്ന ലക്ഷ്യത്തിലൂടെ ഓരോ മനുഷ്യരുടെയും സാമൂഹ്യ ജീവിതം അർത്ഥപൂർണമാക്കാൻ സാധിക്കുമെന്നും മന്ത്രി പറഞ്ഞു.
ചടങ്ങിൽ ചേർത്തല നഗരസഭ അധ്യക്ഷൻ വി.ടി.ജോസഫ് അധ്യക്ഷത വഹിച്ചു. നഗരസഭ വൈസ് ചെയർപേഴ്സൺ ശ്രീലേഖ നായർ, ക്ഷേമ കാര്യ സ്‌റ്റാൻഡിങ് കമ്മിറ്റി സിന്ധു ബൈജു തുടങ്ങിയവർ സംസാരിച്ചു. നഗരസഭാ പരിധിയിൽ 839 ഗുണഭോക്താക്കൾക്കാണ് ലൈഫ് വീടുകൾ ലഭിക്കുന്നത്. ഇതിൽ 700 ലധികം വീടുകളുടെ നിർമാണം പൂർത്തിയായി കഴിഞ്ഞു. സംഗമത്തിന്റെ ഭാഗമായി സിവിൽ സപ്ലൈസ്, കൃഷി, സാമൂഹ്യ നീതി വകുപ്പ്, കുടുംബശ്രീ തുടങ്ങി ഇരുപത് വകുപ്പുകളുടെ സേവനങ്ങളും ഗുണഭോക്താക്കൾക്ക് ലഭ്യമാക്കിയിരുന്നു.
