ആലപ്പുഴ: യുഡിഎഫ് ചേർത്തല നിയോജക മണ്ഡലം സ്ഥാനാർഥി അഡ്വ എസ് ശരത്തിന് വേണ്ടി വോട്ട് അഭ്യർഥിച്ച് പ്രശസ്ത സിനിമ താരം ജഗദീഷ്. ചേർത്തലക്ക് ലഭിക്കാൻ പോകുന്ന ഏറ്റവും മികച്ച എംഎൽഎ ആയിരിക്കും എസ് ശരത് എന്ന് ജഗദീഷ് പറഞ്ഞു. തണ്ണീർമുക്കം പഞ്ചായത്തിലെ വാഹന പ്രചാരണ ജാഥയുടെ സമാപന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു ജഗദീഷ്. യുഡിഎഫ് അധികാരത്തിൽ വന്നാൽ ന്യായ്‌ പദ്ധതി നടപ്പിലാക്കുമെന്നും കാരുണ്യ പദ്ധതി തിരിച്ചു കൊണ്ടുവരുമെന്നും ജഗദീഷ് പറഞ്ഞു.
മരുത്തോർവട്ടം ശ്രീ ധന്വന്തരി ക്ഷേത്രത്തിന് സമീപം നടന്ന സമ്മേളനത്തിന് നിയോജക മണ്ഡലം ഇലക്ഷൻ കമ്മിറ്റി ജനറൽ കൺവീനർ കെ.ആർ രാജേന്ദ്ര പ്രസാദ് അധ്യക്ഷത വഹിച്ചു. സിനിമ സംവിധായകൻ ആലപ്പി ആഷറഫ്, നിർമ്മാതാവ് രഞ്ജിത്ത്, ഡിസിസി പ്രസിഡന്‍റ് എഎ ഷുക്കൂർ, സികെ ഷാജി മോഹൻ, ആർ ശശിധരൻ, ടിഎച്ച് സലാം, സജി കുര്യക്കോസ്, സിഡി ശങ്കർ, പി ഉണ്ണികൃഷ്ണൻ, ശിവകുമാർ, കെ എസ് അഷറഫ്, എംസി ടോമി, സോമകുമാർ എന്നിവർ പ്രസംഗിച്ചു.
