എല്ലാ ജില്ലകളിലും സാംസ്കാരിക സമുച്ചയങ്ങൾ സ്ഥാപിക്കുമെന്ന് തോമസ് ഐസക്

സാംസ്കാരിക സമുച്ചയങ്ങൾ ഉണ്ടാകണമെന്നും സംസ്കാരമുള്ള സമൂഹത്തെ വാർത്തെടുക്കാൻ ഇത് സഹായിക്കുമെന്നും മന്ത്രി.

ആലപ്പുഴ: എല്ലാ ജില്ലകളിലും സാംസ്കാരിക സമുച്ചയങ്ങൾ സ്ഥാപിക്കുമെന്ന് മന്ത്രി തോമസ് ഐസക്ക്. കേരള സംസ്ഥാന ചലച്ചിത്ര വികസന കോർപ്പറേഷന്‍റെ നേതൃത്വത്തിൽ വനിതകൾ സംവിധാനം ചെയ്യുന്ന രണ്ട് ചിത്രങ്ങളിലൊന്നായ നിഷിദ്ധോയുടെ സ്വിച്ചോൺ കർമ്മത്തിന് ശേഷം സംസാരിക്കുകയായിരുന്നു മന്ത്രി. വനിതാ സംവിധായകരുടെ സിനിമകൾക്കായി സംസ്ഥാന ബജറ്റിൽ മൂന്നു കോടി രൂപ വകയിരുത്തിയിട്ടുണ്ട്. സാംസ്കാരിക സമുച്ചയങ്ങൾ കൂടുതലായി ഉണ്ടാകണമെന്നും സംസ്കാരമുള്ള സമൂഹത്തെ വാർത്തെടുക്കാൻ ഇത് സഹായിക്കുമെന്നും മന്ത്രി പറഞ്ഞു. ജില്ലയിൽനിന്ന് വിനോദ സഞ്ചാരികളെ ആകർഷിക്കാനായി പഴയ കെട്ടിടങ്ങൾ നവീകരിച്ച് കഫെറ്റീരിയകളായി മാറ്റുമെന്നും മന്ത്രി അറിയിച്ചു.

വിപ്ലവ ഗായിക പി.കെ മേദിനി സിനിമയുടെ ക്ലാപ്പിങ് നിർവഹിച്ചു. ജില്ലാ കലക്ടർ എം അഞ്ജന ഐഎഎസ്, കേരള സംസ്ഥാന ചലച്ചിത്ര വികസന കോർപ്പറേഷൻ ചെയർമാൻ ഷാജി എൻ കരുൺ എന്നിവരും ചടങ്ങിൽ പങ്കെടുത്തു. സംസ്ഥാന സർക്കാരിന്‍റെ വനിത ശാക്തീകരണ പദ്ധതിയുടെ ഭാഗമായാണ് ചിത്രങ്ങൾ നിർമിക്കുന്നത്. സിനിമാരംഗത്തെ പ്രമുഖർ ഉൾപ്പെട്ട കമ്മിറ്റിയാണ് തിരക്കഥ അവലോകനം നടത്തിയത്. പ്രമുഖ വനിതാ സംവിധായകനായ താര രാമാനുജത്തിന്‍റെ നിഷിദ്ധോ, മിനി ഐയുടെ ഡൈവോഴ്സ് എന്നീ രണ്ട് തിരക്കഥകളാണ് സിനിമ നിർമാണത്തിനായി ജൂറി അംഗങ്ങൾ തെരഞ്ഞെടുത്തത്.