ആലപ്പുഴയുടെ അമരത്തേക്ക് ആരു വരും

ഹാട്രിക്ക് വിജയം ലക്ഷ്യമിട്ടാണ് ഇത്തവണ യു.ഡി.എഫ് ആലപ്പുഴയിൽ പോരിനറങ്ങുന്നതെങ്കിൽ, മണ്ഡലം തിരിച്ചുപിടിക്കുക എന്ന ദൗത്യമാണ് എൽ.ഡി.എഫിന് മുന്നിലുള്ളത്. മാറിയ രാഷ്ട്രിയ സാഹചര്യങ്ങളിൽ എൻ.ഡി.എയും മണ്ഡലത്തിൽ അട്ടിമറികള്‍ പ്രതീക്ഷിക്കുന്നു.

ആലപ്പുഴ ലോക്‌സഭാ മണ്ഡലം

ആലപ്പുഴ ജില്ലയിലെ അരൂർ, ചേർത്തല‍‍‍, ആലപ്പുഴ, അമ്പലപ്പുഴ, ഹരിപ്പാട്‍, കായംകുളം, കൊല്ലം ജില്ലയിലെ കരുനാഗപ്പള്ളി എന്നീ നിയമസഭാ മണ്ഡലങ്ങൾ ഉൾക്കൊള്ളുന്നതാണ്‌ ആലപ്പുഴ ലോക്സഭാ മണ്ഡലം. കമ്മ്യൂണിസ്റ്റു പ്രസ്ഥാനത്തിനു പറയാൻ ഏറെ ചരിത്രമുള്ള മണ്ണ്. 2016 ലെ നിയമസഭാ തെരഞ്ഞെടുപ്പിൽ ആലപ്പുഴ ലോക്സഭയിൽ 7 നിയമസഭാ മണ്ഡലങ്ങളിൽ 6 ലും വിജയിച്ചതും ഇടത് സ്ഥാനർത്ഥികൾ തന്നെ. എന്നാൽ ഈ ചരിത്രമോ, കണക്കുകളോ, ഒന്നും ലോക്സഭാ തെരഞ്ഞെടുപ്പുകളിൽ ഇടതിനെ പിന്തുണച്ചിട്ടില്ല. ആകെ നടന്ന 12 തെരഞ്ഞെടുപ്പുകളിൽ 8 ലും വിജയം യുഡിഎഫിന് ഒപ്പമായിരുന്നു. കോൺഗ്രസ് നേതാവ് വിഎം സുധീരന്‍ ആണ് ഏറ്റവുമധികം തവണ ആലപ്പുഴ മണ്ഡലത്തിൽ നിന്ന് തിരഞ്ഞെടുക്കപ്പെട്ടിട്ടുള്ള ജന പ്രതിനിധി. ഇത്തവണ ഹാട്രിക്ക് വിജയം ലക്ഷ്യമിട്ടാണ് കോൺഗ്രസ് ആലപ്പുഴയിൽ ഇറങ്ങുന്നത്. എന്നാൽ 2009 ൽ നേടിയ ഭൂരിപക്ഷത്തിന് കഴിഞ്ഞ ഇടിവുണ്ടായത് യു.ഡി.എഫ് ക്യാമ്പുകളെ ആശങ്കയിലാക്കുന്നുണ്ട്. 2009 ൽ 57635 വോട്ടുകളുടെ ഭൂരിപക്ഷം സ്വന്തമാക്കിയ യു.ഡി.എഫ്. 2014 ൽ 19407 വോട്ടുകളുടെ ഭൂരിപക്ഷമായി ചുരുങ്ങി. 462525 വോട്ടുകളാണ് അന്ന് യു.ഡി.എഫ് ആകെ മണ്ഡലത്തിൽ നിന്ന് സ്വന്തമാക്കിയത്. 443118 വോട്ടുകൾ നേടി എൽ.ഡി.എഫ് രണ്ടാം സ്ഥാനത്തേക്ക് തള്ളപെട്ടപ്പോൾ , 43051 വോട്ടുകൾ നേടിയാ ആർ.എസ്.പി താമരാക്ഷകൻ വിഭാഗം മൂന്നാം സ്ഥാനത്തെത്തി.

ആലപ്പുഴ ലോക്‌സഭാ മണ്ഡലം വോട്ട്നില 2014

കഴിഞ്ഞ 2 തവണ മണ്ഡലം നില നിർത്തിയ കെസി വേണുഗോപാലിന് പകരം, ഷാനിമോൾ ഉസ്മാനാണ് ഇത്തവണ ആലപ്പുഴയിലെ വലത് സ്ഥാനാർഥി. ആലപ്പുഴ നഗരസഭയുടെ പ്രഥമ വനിത അധ്യക്ഷ എന്ന കരുത്തോടെയാണ് ഷാനിമോള്‍ ഉസ്മാന്‍ മണ്ഡലം സ്ഥാനാര്‍ത്ഥിയാകുന്നത്.

ഹാട്രിക്ക് വിജയത്തിൽ കുറഞ്ഞതൊന്നും മണ്ഡലത്തിൽ നിന്നു യുഡിഎഫ് സ്വപ്നം കാണുന്നില്ല.

അരൂർ എംഎൽഎ എംഎം ആരിഫാണ് ഇത്തവണ അലപ്പുഴയിലെ ഇടത് സ്ഥാനാർഥി. മണ്ഡലത്തിലെ 7 നിയസഭകളിൽ 6 എണ്ണവും കൈവശമുള്ളതാണ് ഇടതിന് ഇത്തവണ ഏറ്റവും പ്രതീക്ഷ നൽകുന്ന ഘടകം. 2017ൽ ഇന്ത്യയിലെ ഏറ്റവും മികച്ച നിയമസഭാ സാമാജികനുള്ള കാശ്മീർ ടു കേരള സോഷ്യൽ ഫൗണ്ടേഷൻ അവാർഡ് നേടിയ ആരിഫിന് മണ്ഡലത്തിലുള്ള ബന്ധങ്ങളും ഗുണം ചെയ്യുമെന്ന് സിപിഎം കണക്ക് കൂട്ടുന്നു. വലത് കോട്ട ആണെങ്കിലും 2014 ൽ യുഡിഎഫിന്‍റെ ഭൂരിപക്ഷം മണ്ഡലത്തിൽ കുറഞ്ഞത് ശുഭ പ്രതീക്ഷയായാണ് എൽഡിഎഫ് വിലയിരുത്തുന്നത്. ആദ്യം സ്ഥാനാർഥി പ്രഖ്യാപനം നടത്തി പ്രചാരണത്തില്‍ ബഹുദൂരം മുന്നിലെത്തിയ എല്‍ഡിഎഫ് ആലപ്പുഴ തിരിച്ചുപിടിക്കാമെന്ന ശുഭപ്രതീക്ഷയിലാണ്.

കോൺഗ്രസിൽ നിന്നു ബിജെപി യിൽ എത്തിയ കെഎസ് രാധാകൃഷ്ണനാണ് ഇത്തവണ എൻഡിഎ യുടെ ആലപ്പുഴ സ്ഥാനർഥി. മുന്‍ കോണ്‍ഗ്രസ് നേതാവെന്ന നിലയിലും അക്കാഡമിക് വിദഗ്ധൻ എന്ന നിലയിലുമുള്ള ബന്ധങ്ങള്‍ അലപ്പുഴയിൽ അനൂകൂല ഘടകമാകുമെന്ന് എൻഡിഎ കണക്കു കൂടുന്നു. മണ്ഡലത്തിലെ വലിയൊരു വിഭാഗം എസ്എൻഡിപി വോട്ടുകളിലും എൻഡിഎ കണ്ണുവെയ്ക്കുന്നുണ്ട്.

സാമ്പത്തിക സംവരണ പ്രഖ്യാപനം, മത്സ്യത്തൊഴിലാളികൾക്കുള്ള ആനുകൂല്യങ്ങൾ തുടങ്ങിയ വിഷയങ്ങൾ മണ്ഡലത്തിലെ വോട്ടർമാരിൽ പ്രധാന സ്വാധീനം ചെലുത്തുന്ന ഘടകങ്ങളിൽ ചിലതാണ്. പ്രളയകാലത്തെ സർക്കാരിന്‍റെ പ്രവർത്തനം, വികസന പ്രവർത്തനങ്ങൾ, ആലപ്പുഴ ബൈപ്പാസ് തുടങ്ങിയവയും മണ്ഡലത്തിൽ ഇത്തവണ വോട്ടർമാരെ സ്വാധീനിക്കുന്ന വിഷയങ്ങളാകും.

ആലപ്പുഴ ലോക്‌സഭാ മണ്ഡലം വിശദമായ വോട്ട്നില 2014

സാമുദായിക ഘടകങ്ങൾ പരിശോദിച്ചാൽ എസ്എൻഡിപി യാണ് മണ്ഡലത്തിലെ പ്രധാനശക്തി. ചേർത്തല, ഹരിപ്പാട്, കരുനാഗപ്പള്ളി എന്നിവിടങ്ങൾ എസ്എൻഡിപിയുടെ പ്രധാന സ്വാധീന മേഖലകളാണ്. മുസ്ളീം ഭൂരിപക്ഷ മേഖലകളിലെ വോട്ട് ലക്ഷ്യമിട്ടാണ് ആരിഫിനെ ആദ്യം സ്ഥാനാർഥിയായി എല്‍ഡിഎഫ് പ്രഖ്യാപിച്ചത്. എന്നാല്‍ ഷാനിമോൾ ഉസ്മാൻ കൂടി എത്തിയതോടെ മത്സരം ശക്തമായി. 2019 ജനുവരി വരെയുള്ള ഇലക്ഷൻ

ഇലക്ഷൻ കമീഷന്‍റെ ഔദ്യോഗിക കണക്കുകൾ പ്രകാരം 1314535 വോട്ടർമാരാണ് മണ്ഡലത്തിൽ ഉള്ളത്. ഇതിൽ 633371 പുരുഷ വോട്ടർമാരും 681164 സ്ത്രീ വോട്ടർമാരും ഉൾപ്പെടുന്നു.