ആലപ്പുഴ: ജില്ലാ കലക്ടര്‍ എം.അഞ്ജനയുടെ നേതൃത്വത്തില്‍ ജില്ലയില്‍ പരാതി പരിഹാര അദാലത്ത് സംഘടിപ്പിച്ചു. ജില്ലാ പഞ്ചായത്ത് ഹാളിലാണ് അദാലത്തിന് തുടക്കം കുറിച്ചത്. അമ്പലപ്പുഴ താലൂക്ക് പരിധിയില്‍ നിന്നുള്ള പരാതികളാണ് ജില്ലാ കലക്ടര്‍ നേരിട്ട് പരിഗണിച്ചത്. റവന്യൂവകുപ്പുമായി ബന്ധപ്പെട്ട പരാതികള്‍ക്ക് പുറമേ മറ്റു വകുപ്പുകളുമായി ബന്ധപ്പെട്ട പരാതികളും കലക്ടര്‍ക്ക് ലഭിച്ചു.
ആകെ 84 പരാതികളാണ് കലക്ടറുടെ മുന്നിലെത്തിയത്. ഇതില്‍ 42 പരാതികളിലും തീര്‍പ്പുുകല്‍പ്പിച്ചു. വിവിധ വകുപ്പുകളുമായി ബന്ധപ്പെട്ട 42 പരാതികള്‍ സമയ പരിധി നിശ്ചയിച്ച് അതാത് വകുപ്പുകള്‍ക്ക് കൈമാറി. ഇവയിൽ പരിഹാരം കണ്ടെത്തി റിപ്പോര്‍ട്ട് നല്‍കാന്‍ കലക്ടർ നിര്‍ദേശം നല്‍കി.
