ആലപ്പുഴ: ഓരോ ആഘോഷങ്ങളും മറ്റുള്ളവർക്ക് പകർന്നു നൽകുന്ന സന്ദേശങ്ങളാവണമെന്ന ചിന്തയിൽ നിന്നാണ് ആലപ്പുഴയിൽ വ്യത്യസ്തമായ ഒരു ക്രിസ്മസ് ട്രീ ഒരുങ്ങിയത്. ഇതിന് പിന്നിൽ പ്രവർത്തിച്ചവരാവട്ടെ ആലപ്പുഴയിലെ ഒരു കൂട്ടം സർക്കാർ ഉദ്യോഗസ്ഥരും. മലിനീകരണ നിയന്ത്രണ ബോർഡ് ആലപ്പുഴ ഓഫീസിലെ ഉദ്യോഗസ്ഥരാണ് പാഴ്‌വസ്തുക്കൾ കൊണ്ട് ഒരുഗ്രൻ ക്രിസ്മസ് ട്രീ ഒരുക്കിയത്. ടയറും കുപ്പിയും മുതൽ കൈതച്ചക്കയുടെ അവശിഷ്ടങ്ങൾ വരെ ക്രിസ്മസ് ട്രീയിൽ ഉപയോഗിച്ചിട്ടുണ്ട്. ഇവ ആകർഷകമായ നിറത്തിലും രൂപത്തിലും ഒരുക്കിയതോടെ ക്രിസ്മസ് ട്രീയുടെ പകിട്ടേറി. ഇതെല്ലാം ജീവനക്കാർ തന്നെ ശേഖരിച്ച് രൂപമാറ്റം വരുത്തിയതാണ്. ഇവയെല്ലാം വർണ്ണക്കടലാസുകളും കയർ നാരുകളും കൊണ്ട് അലങ്കരിച്ചു. പിന്നീട് അവ ട്രീയിൽ ഉള്‍പ്പെടുത്തിയെന്ന് ക്രിസ്മസ് ട്രീ ഒരുക്കിയതിന് നേതൃത്വം നൽകിയ ശ്രീകല പറയുന്നു.
നിരത്തിൽ വലിച്ചെറിഞ്ഞ കുപ്പികൾ ഉദ്യോഗസ്ഥർ ശേഖരിച്ച് അവയ്ക്ക് പല നിറങ്ങൾ നൽകി ഭംഗിയാക്കി. ആഘോഷങ്ങളുടെ വിവിധ രൂപങ്ങൾ ഓഫീസിൽ പ്രകടമാണ്. ഔദ്യോഗിക കൃത്യനിർവഹണത്തിൽ ഓരോ മാസവും മികച്ച പ്രകടനം കാഴ്ചവെക്കുന്ന ഉദ്യോഗസ്ഥരുടെ ചിത്രവും ഇത്തരത്തിൽ ഉപയോഗിച്ച് വലിച്ചെറിഞ്ഞ പ്ലാസ്റ്റിക് ബക്കറ്റുകളുടെ മൂടിയിൽ ഭംഗിയായി ഒട്ടിച്ച് ഓഫീസിൽ വച്ചിട്ടുണ്ട്.
പ്രചോദന വാക്യങ്ങളാണ് ആദ്യം കാർഡ്ബോർഡുകൾ ഉപയോഗിച്ച് സ്ഥാപിച്ചത്. പിന്നീട് ഓഫീസിലെ ഓരോയിടത്തും ഇത്തരത്തിലുള്ള അലങ്കാര വസ്തുക്കൾ നിർമിച്ച് സ്ഥാപിക്കാൻ തുടങ്ങി. വിവിധ ആവശ്യങ്ങൾക്കായി ഓഫീസിൽ എത്തുന്ന പൊതുജനങ്ങളിൽ നിന്ന് മികച്ച പ്രതികരണമാണ് ലഭിക്കുന്നതെന്നും ഓഫീസ് മേധാവി ബിജു ബാലകൃഷ്ണൻ പറയുന്നു.
ക്രിസ്മസ് ട്രീ കൂടാതെ ഓഫീസിലേക്ക് രാസപദാർഥങ്ങൾ എത്തിച്ച പ്ലാസ്റ്റിക് ബക്കറ്റ് ഉപയോഗിച്ച് ഒരു മഞ്ഞു മനുഷ്യനെയും ഇവർ നിർമിച്ചു. നിരവധി ആളുകളാണ് ഇവ കാണാൻ ദിവസവും ഓഫീസിൽ എത്തുന്നത്. ഇതിനുപുറമേ ഉപയോഗശൂന്യമായ പേനകളും ബാറ്ററി ഉൾപ്പെടെയുള്ള ഇ-വേസ്റ്റുകളും നിക്ഷേപിക്കാനും ഇവിടെ സൗകര്യം ഒരുക്കിയിട്ടുണ്ട്. ഇത്തരത്തിൽ ശേഖരിക്കുന്നവ റീസൈക്കിൾ നടത്തി പുനരുത്പ്പാദനം നടത്തി ഉപയോഗിക്കാവുന്ന തരത്തിലേക്ക് മാറ്റാനുള്ള സൗകര്യവും ഓഫീസിൽ ഒരുക്കിയിട്ടുണ്ട്. സമൂഹത്തിന് മാതൃകയാക്കാവുന്ന നിരവധി പദ്ധതികൾ വരുംകാലങ്ങളിൽ ആവിഷ്കരിച്ച് നടപ്പാക്കാനുള്ള ശ്രമത്തിലാണിവർ.
