ലണ്ടൻ: യുഎസ് താരം സെറീന വില്യംസ് വിംബിൾഡണിൽ നിന്ന് പിന്മാറി. പരിക്കിനെ തുടർന്നാണ് ആദ്യ റൗണ്ട് പൂർത്തിയാക്കാതെയാണ് താരം മടങ്ങിയത്. ബലാറസിന്‍റെ അലക്‌സാണ്ട്ര സാസ്‌നോവിച്ചുമായുള്ള മത്സരത്തിനിടെയാണ് താരത്തിന്‍റെ ഇടത് കാലിന് പരിക്കേൽക്കുന്നത്. മത്സരം തുടരാന്‍ ശ്രമം നടത്തിയെങ്കിലും ആദ്യ സെറ്റിൽ സ്‌കോർ 3-3ൽ നില്‍ക്കെ 39 കാരിയായ സെറീന കളി മതിയാക്കുകയായിരുന്നു.
ഏഴ് തവണ വിംബിൾഡൺ ചാമ്പ്യനായ താരം തന്‍റെ എട്ടാം കിരീടം ലക്ഷ്യമിട്ടായിരുന്നു ടൂര്‍ണമെന്‍റിനെത്തിയത്. എന്നാല്‍ കരഞ്ഞുകൊണ്ട് കളിക്കളം വിട്ട താരത്തെ ആരാധകര്‍ കയ്യടികളോടെയാണ് തിരിച്ചയത്. നേരത്തെ ടോക്കിയോ ഒളിമ്പിക്സിനും ഉണ്ടാവില്ലെന്ന് താരം അറിയിച്ചിരുന്നു.
also read: യൂറോ കപ്പ്: ക്വാര്‍ട്ടര്‍ പോരാട്ടങ്ങള്‍ക്ക് ജൂലൈ രണ്ടിന് തുടക്കം
വിംബിൾഡണിന് മുന്നോടിയായുള്ള വാര്‍ത്താസമ്മേളനത്തിലാണ് സെറീന ഇക്കാര്യം പറഞ്ഞ്. താന്‍ യുഎസിന്‍റെ ഒളിമ്പിക് പട്ടികയില്‍ ഇല്ലെന്ന് പറഞ്ഞ താരം കാരണങ്ങള്‍ വ്യക്തമാക്കിയിരുന്നില്ല. സെറീനയ്ക്ക് മുന്നെ സ്‌പാനിഷ് ഇതിഹാസം റാഫേല്‍ നദാല്‍, യുവ താരം ഡൊമിനിക്ക് തീം എന്നിവരും ഒളിമ്പിക്‌സിനില്ലെന്ന് അറിയിച്ചിരുന്നു.
