ലണ്ടന്‍: വിംബിൾഡൺ ടെന്നിസില്‍ കുതിപ്പ് തുടര്‍ന്ന് ഇന്ത്യന്‍ താരം സാനിയ മിർസ. മിക്‌സഡ് ഡബിൾസിൽ ക്രൊയേഷ്യന്‍ പങ്കാളി മേറ്റ് പാവികിനൊപ്പമാണ് സാനിയ സെമിയില്‍ പ്രവേശിച്ചത്. ക്വാർട്ടർ ഫൈനലിൽ നാലാം സീഡായ ജോൺ പിയേഴ്‌സ്-ഗബ്രിയേല ഡബ്രോസ്‌കി ജോഡിയെയാണ് ആറാം സീഡായ മിർസ-പാവിക് സഖ്യം കീഴടക്കിയത്.
മത്സരത്തില്‍ ഒന്നിന് എതിരെ രണ്ട് സെറ്റുകള്‍ക്കാണ് മിർസ-പാവിക് സഖ്യം ജയം പിടിച്ചത്. സ്‌കോര്‍: 6-4, 3-6, 7-5. കരിയറില്‍ ആദ്യമായാണ് വിംബിൾഡൺ മിക്‌സഡ് ഡബിള്‍സിന്‍റെ സെമിയില്‍ സാനിയ പ്രവേശിക്കുന്നത്.
സെമിയില്‍ രണ്ടാം സീഡായ ഡെസിറേ ക്രാവ്‌സിക്-നീൽ സ്‌കുപ്‌സ്‌കി ജോഡിയും ഏഴാം സീഡായ ജെലീന ഒസ്റ്റാപെങ്കോ-റോബർട്ട് ഫറ സഖ്യവും തമ്മിലുള്ള മത്സരത്തിലെ വിജയിയാവും മിർസ-പാവിക് സഖ്യത്തിന്‍റെ എതിരാളികള്‍.
ഈ സീസൺ അവസാനത്തോടെ വിരമിക്കൽ പ്രഖ്യാപിച്ച സാനിയയുടെ അവസാന വിംബിൾഡണ്‍ ആണിത്. നേരത്തെ രണ്ടാം റൗണ്ടില്‍ വാക്കോവര്‍ ലഭിച്ചാണ് മിർസ-പാവിക് സഖ്യം ക്വാർട്ടറില്‍ എത്തിയത്. വനിത ഡബിൾസിലും സാനിയ കളിക്കാന്‍ ഇറങ്ങിയിരുന്നു. എന്നാല്‍ ഓപ്പണിങ് റൗണ്ടിൽ 35 കാരിയായ സാനിയയും, ചെക്ക് പങ്കാളി ലൂസി ഹ്രഡെക്കയും പരാജയപ്പെടുകയായിരുന്നു.
