ദോഹ : ഖത്തര്‍ ലോകകപ്പിന്‍റെ പ്രീ ക്വാര്‍ട്ടറില്‍ കൊറിയയ്‌ക്കെതിരായ ബ്രസീലിന്‍റെ വിജയം എതിരാളികള്‍ക്ക് ചങ്കിടിപ്പേറ്റുന്നതാണ്. അട്ടിമറി സ്വപ്നം കണ്ടിറങ്ങിയ ഏഷ്യന്‍ കരുത്തരെ ഒന്നിനെതിരെ നാല് ഗോളുകള്‍ക്കാണ് കാനറികള്‍ തകര്‍ത്തുവിട്ടത്. സ്‌റ്റേഡിയം 974ല്‍ നടന്ന മത്സരത്തിന്‍റെ തുടക്കം തൊട്ടുതന്നെയുള്ള ആക്രമണത്തിലൂടെ കാനറികള്‍ നയം വ്യക്തമാക്കിയിരുന്നു.
തുടര്‍ന്ന് ആദ്യ പകുതിയില്‍ തന്നെ സംഘം ഗോള്‍ പട്ടിക തികയ്‌ക്കുകയും ചെയ്‌തു. മത്സരത്തിന്‍റെ ഏഴാം മിനിട്ടില്‍ വിനീഷ്യസ് ജൂനിയറാണ് ഗോള്‍ വേട്ടയ്‌ക്ക് തുടക്കമിട്ടത്. പിന്നാലെ നെയ്‌മര്‍, റിച്ചാര്‍ലിസണ്‍, ലൂയിസ് പക്വെറ്റ എന്നിവരും കൊറിയന്‍ വല കുലുക്കി.
രണ്ടാം പകുതിയില്‍ പൈക് സിയുങ് ഹോയാണ് കൊറിയയുടെ ആശ്വാസ ഗോള്‍ നേടിയത്. 1998ന് ശേഷം ഒരു ലോകകപ്പ് നോക്കൗട്ട് മത്സരത്തിൽ ബ്രസീൽ ആദ്യമായാണ് നാല് ഗോളുകൾ നേടുന്നത്. കൊറിയയ്‌ക്കെതിരായ വിജയത്തോടെ ഖത്തറില്‍ കിരീടത്തില്‍ കുറഞ്ഞതൊന്നും ലക്ഷ്യം വയ്‌ക്കുന്നില്ലെന്ന സന്ദേശം തന്നെയാണ് ടിറ്റെയുടെ സംഘം എതിരാളികള്‍ക്ക് നല്‍കുന്ന മുന്നറിയിപ്പ്.
മത്സര ശേഷം സൂപ്പര്‍ താരം നെയ്‌മര്‍ ഇക്കാര്യം ആവര്‍ത്തിക്കുകയും ചെയ്‌തു. "ഖത്തറില്‍ ഞങ്ങൾ കിരീടം സ്വപ്നം കാണുന്നു, അത് വ്യക്തമാണ്. പക്ഷേ പടിപടിയായി മാത്രമേ ഞങ്ങള്‍ക്ക് അതിലേക്ക് എത്താനാവൂ" - നെയ്‌മര്‍ പറഞ്ഞു.
പരിക്ക് ഭയപ്പെടുത്തി : സെര്‍ബിയയ്‌ക്കെതിരായ ആദ്യ മത്സരത്തില്‍ പരിക്കേറ്റ നെയ്‌മറിന് ഗ്രൂപ്പ് ഘട്ടത്തിലെ മറ്റ് മത്സരങ്ങള്‍ക്ക് ഇറങ്ങാനായിരുന്നില്ല. സെര്‍ബിയന്‍ താരം നിക്കോള മിലെൻകോവിച്ചിന്‍റെ ടാക്ലിങ്ങിനിടെ നെയ്‌മറുടെ വലത് കണങ്കാലിനാണ് പരിക്കേറ്റത്. ഇതിന് പിന്നാലെ താരത്തിന് പനി ബാധിച്ചതായി സഹ താരം വിനീഷ്യസ് ജൂനിയര്‍ പറഞ്ഞിരുന്നു.
Also read: ഗോളടിമേളവും നൃത്തച്ചുവടും ; ദക്ഷിണ കൊറിയയെ തകര്‍ത്ത് ബ്രസീല്‍ ക്വാര്‍ട്ടറില്‍
എന്നാല്‍ കൊറിയയ്‌ക്കെതിരായ തകര്‍പ്പന്‍ പ്രകടനത്തോടെ മത്സരത്തിന്‍റെ താരമായും നെയ്‌മര്‍ തെരഞ്ഞെടുക്കപ്പെട്ടു. ഒരുഘട്ടത്തില്‍ ടൂർണമെന്‍റിൽ ഇനി കളിക്കാനാവില്ലെന്ന് താന്‍ ഭയപ്പെട്ടിരുന്നതായും 30കാരനായ നെയ്‌മര്‍ തുറന്നുപറഞ്ഞു. "എനിക്ക് പരിക്കേറ്റ ആ രാത്രി എറെ പ്രയാസത്തോടെയാണ് കടന്നുപോയത്.
ഞാൻ ഒരു ദശലക്ഷം വ്യത്യസ്ത കാര്യങ്ങളെക്കുറിച്ച് ചിന്തിക്കുകയായിരുന്നു. ടൂര്‍ണമെന്‍റില്‍ ഇനി ഒരു പക്ഷേ കളിക്കാനായേക്കില്ലെന്ന ഭയം പോലും എന്‍റെ മനസില്‍ ഉടലെടുത്തിരുന്നു"- നെയ്‌മര്‍ കൂട്ടിച്ചേര്‍ത്തു.
