ഹാങ്‌ചോ: ഏഷ്യന്‍ ഗെയിംസ് (Asian Games 2023) അത്‌ലറ്റിക്‌സില്‍ മലയാളിത്തിളക്കം. പുരുഷ വിഭാഗം ലോങ് ജംപില്‍ മലയാളിയായ എം ശ്രീശങ്കര്‍ (M Sreeshankar) വെള്ളി നേടിയപ്പോള്‍ പുരുഷന്മാരുടെ 1500 മീറ്റര്‍ ഓട്ടത്തില്‍ മറ്റൊരു മലയാളി താരം ജിന്സന് ജോണ്‍സണ്‍ (Jinson Johnson) വെങ്കലം സ്വന്തമാക്കി. 8.19 മീറ്റര്‍ ദൂരം ചാടിയാണ് പാലക്കാട്ടുകാരനായ എം ശ്രീശങ്കര്‍ വെള്ളി നേടിയത് (M Sreeshankar wins long jump silver Asian Games 2023).
ശ്രീശങ്കറിന്‍റെ ആദ്യ ശ്രമം ഫൗളില്‍ കലാശിച്ചിരുന്നു. രണ്ടും മൂന്നും ചാട്ടങ്ങള്‍ മികച്ച രീതിയില്‍ ഫിനിഷ് ചെയ്‌ത താരം നാലാമത്തെ ശ്രമത്തിലാണ് വെള്ളിയിലേക്കുള്ള ദൂരം കണ്ടെത്തിയത്. അഞ്ചാം ശ്രമം ഫൗളായപ്പോള്‍ അവസാന ശ്രമത്തില്‍ 8.19 മീറ്റര്‍ ദൂരം മെച്ചപ്പെടുത്താനായില്ല. മൂന്ന് സെന്‍റീമീറ്റര്‍ വ്യത്യാസത്തില്‍ ചൈനയുടെ വാങ് ജിയാനാണ് ഒന്നാം സ്ഥാനത്ത് എത്തിയത്. 8.22 മീറ്ററാണ് ചൈനീസ് താരം ചാടിയത്.
1500 മീറ്റര്‍ ഓട്ടത്തില്‍ മൂന്ന് മിനിട്ട് 39.74 സെക്കന്‍ഡില്‍ ഫിനിഷ് ചെയ്‌താണ് കോഴിക്കാട്ടുകാരനായ ജിന്സന് ജോണ്‍സണ്‍ വെങ്കലം സ്വന്തമാക്കിയത് (Jinson Johnson won bronze in men’s 1500m Asian Games 2023). ഈ ഇനത്തില്‍ ഇന്ത്യയുടെ തന്നെ അജയ് കുമാർ സരോജാണ് വെള്ളി നേടിയത്. മൂന്ന് മിനിട്ട് 38.94 സെക്കന്‍ഡിലാണ് അജയ് കുമാർ ഫിനിഷ് ചെയ്‌തത്.
പുരുഷന്മാരുടെ 800 മീറ്ററിലും 1500 മീറ്ററിലും ദേശീയ റെക്കോഡിന് ഉടമയാണ് ജിന്സന്. 2018 ജക്കാർത്ത ഏഷ്യൻ ഗെയിംസിൽ 800 മീറ്ററില്‍ വെള്ളി നേടിയ താരം 1500 മീറ്ററില്‍ സ്വര്‍ണം സ്വന്തമാക്കിയിരുന്നു. അതേസമയം അത്‌ലറ്റിക്‌സില്‍ നിന്നും ഇന്ത്യയ്‌ക്ക് ഇതുവരെ രണ്ട് സ്വര്‍ണം ലഭിച്ചിട്ടുണ്ട്.
പുരുഷന്മാരുടെ ഷോട്ട് പുട്ടില്‍ തജീന്ദര്‍പാല്‍ സിങ്ങും 3000 മീറ്റര്‍ സ്റ്റീപ്പിള്‍ചേസില്‍ അവിനാഷ് സാബ്ലെയുമാണ് സ്വര്‍ണം നേടിയത്. ഷോട്ട്‌പുട്ട് 20.36 മീറ്റര്‍ ദൂരത്തേക്ക് എറിഞ്ഞാണ് തജീന്ദര്‍പാല്‍ സിങ്ങിന്‍റെ സ്വര്‍ണ നേട്ടം (Tajinderpal Singh Toor won Gold medal In men's shot put at Asian Games 2023).
ALSO READ: India Win Gold in Trap Men's Team Event : ഷൂട്ടിങ്ങില്‍ വീണ്ടും സ്വര്‍ണക്കൊയ്‌ത്ത് ; പുരുഷ വിഭാഗം ട്രാപ് ടീം ഇനത്തില്‍ ഇന്ത്യ ഒന്നാമത്
പുരുഷന്മാരുടെ 3000 മീറ്റര്‍ സ്റ്റീപ്പിള്‍ചേസില്‍ ഏഷ്യന്‍ ഗെയിംസ് റെക്കോഡിട്ടാണ് അവിനാഷ് സാബ്ലെ സ്വര്‍ണം നേടിയത്. 8 മിനിട്ട് 19.50 സെക്കന്‍റിലാണ് താരം ഫിനിഷ് ചെയ്‌തത്. (Avinash Sable won the gold medal in men’s 3000m steeplechase at Asian Games 2023). ഇന്ത്യന്‍ താരത്തിന്‍റെ പ്രകടനത്തോടെ 2018-ല്‍ ജക്കാർത്തയില്‍ ഇറാന്‍റെ ഹുസൈൻ കെയ്‌ഹാനി സ്ഥാപിച്ച 8 മിനിട്ട് 22.79 ഏഷ്യന്‍ ഗെയിംസ് റെക്കോഡാണ് പഴങ്കഥയായത്.
