കണ്ണൂർ; സംസ്ഥാന സ്കൂൾ കായികമേളയിൽ സ്കൂളുകൾ തമ്മിലുള്ള കിടമത്സരം കുട്ടികളുടെ ഭാവിയെ തകർക്കുമെന്ന് പ്രശസ്ത കായിക പരിശീലകൻ ദ്രോണാചാര്യ കെ.പി തോമസ് മാഷ്. ഇടിവി ഭാരതിന് നല്‍കിയ പ്രത്യേക അഭിമുഖത്തിലാണ് കായികമേളയില്‍ കിരീടം നേടാൻ സ്കൂളുകൾ പ്രായം തിരുത്തുന്നതും മരുന്നടിക്കുന്നതും അടക്കമുള്ള ഗൗരവകരമായ കുറ്റകൃത്യങ്ങളെ കുറിച്ച് തോമസ് മാഷ് വെളിപ്പെടുത്തിയത്.
ഇതര സംസ്ഥാന തൊഴിലാളികളെ ജോലിക്ക് ഉപയോഗിക്കുന്നതു പോലെ സ്കൂളുകൾ വിദ്യാർഥികളെ ഉപയോഗപ്പെടുത്തുകയാണ്. സെന്‍റ് ജോർജ് കോതമംഗലമാണ് ഇതിന് തുടക്കമിട്ടത്. പിന്നീട് പല സ്കൂളുകളും ഇത് ഏറ്റെടുത്തു.
മരുന്നടിയും പ്രായം തിരുത്തലും വ്യാപകമെന്ന് കെപി തോമസ് മാഷ് പ്രായം തിരുത്തിയെത്തുന്ന 22 വയസ്സുള്ള മണിപ്പൂരി വിദ്യാർഥിക്കൊപ്പം മത്സരിച്ചാണ് 14 വയസ്സുള്ള മലയാളി തോൽക്കുന്നത്. ഇങ്ങനെ പോയാൽ നമ്മുടെ കുരുന്നുകൾ മത്സരം അവസാനിപ്പിക്കും. മെഡൽ നേടിയ കുട്ടികൾക്കായി സ്കൂളുകളുടെ ലേലം വിളിയാണെന്നും 16 വർഷം മുൻപ് വരെ കോരുത്തോട് സ്കൂളിനെ സംസ്ഥാന സ്കൂൾ കായികമേളയില്‍ ചാമ്പ്യൻമാരാക്കിയ തോമസ് മാഷ് പറഞ്ഞു. കോരുത്തോട് സ്കൂളിന് ചാമ്പ്യൻഷിപ്പ് നേടിക്കൊടുത്തപ്പോൾ ലഭിച്ചത് അയ്യായിരം രൂപയാണ്.കുട്ടികളുടെ കണക്ക് നിരത്തി എട്ട് ലക്ഷം വരെയാണ് സ്കൂളുകൾ ഇപ്പോൾ വാങ്ങുന്നത്. സ്കൂളുകൾ തമ്മിലുള്ള കിട മത്സരവും അതിനായി മയക്കുമരുന്നടിക്കുന്നതും കുട്ടികളുടെ ഭാവിയെ തകർക്കും. വേൾഡ് മലയാളി ഫെഡറേഷന് വേണ്ടി എട്ടിനും പതിനാലിനും ഇടയിലുള്ള 20 കുട്ടികളെയാണ് തോമസ് മാഷ് ഇപ്പോൾ പരിശീലിപ്പിക്കുന്നത്. എട്ട് മെഡലുകൾ അവർ കണ്ണൂർ കായിക മേളയിൽ കരസ്ഥമാക്കിക്കഴിഞ്ഞു. ഒളിംപിക്സ് മെഡലിന് ഇനി ഏറെ പ്രതീക്ഷ കേരളത്തിൽ നിന്നാണെന്നും തോമസ് മാഷ് ഇടിവി ഭാരതിനോട് പങ്കുവെച്ചു.
