ആഫ്രിക്കൻ വൻ‌കരയിൽ നിന്നുള്ള എക്കാലത്തെയും മികച്ച ഫുട്ബോളറായി വിലയിരുത്തപ്പെടുന്ന താരമാണ് ജോർജ് വിയ. ദാരിദ്ര്യത്തോടും പട്ടിണിയോടും പടവെട്ടി ഫുട്ബോൾ ലോകത്തിന്‍റെ നെറുകയിലേക്ക് ഉയര്‍ന്ന വിയയുടെ കരിയര്‍ സമാനതകളില്ലാത്തതാണ്. 1986 മുതല്‍ ലൈബീരിയന്‍ ദേശീയ ടീമിനായി പന്ത് തട്ടി തുടങ്ങിയ വിയ യൂറോപ്പിലെ മുന്‍നിര ക്ലബുകള്‍ക്കായും കളിച്ചിട്ടുണ്ട്.
ഫിഫ ലോക ഫുട്ബോളർ, യൂറോപ്യൻ ഫുട്ബോളർ, ആഫ്രിക്കൻ ഫുട്ബോളർ, ബാലണ്‍ ദ്യോർ തുടങ്ങിയ പുരസ്‌കാരങ്ങള്‍ സ്വന്തമാക്കാന്‍ താരത്തിന് കഴിഞ്ഞിട്ടുണ്ട്. എന്നാല്‍ തന്‍റെ ഐതിഹാസിക കരിയറില്‍ ഒരിക്കല്‍ പോലും ലോകകപ്പില്‍ പന്തുതട്ടാനുള്ള ഭാഗ്യം താരത്തിനുണ്ടായിട്ടില്ല. രാജ്യത്തെ ലോകകപ്പിൽ പങ്കെടുപ്പിക്കുകയാണ് തന്‍റെ സ്വപ്‌നമെന്ന് ലോക ഫുട്ബോളറായി തെരഞ്ഞെടുക്കപ്പെട്ട വേളയില്‍ വിയ പറഞ്ഞിരുന്നു.
1996, 2002 വര്‍ഷങ്ങളില്‍ ലൈബീരിയയ്‌ക്ക് ആഫ്രിക്കന്‍ നേഷന്‍സ് കപ്പിന് യോഗ്യത നേടിക്കൊടുത്ത വിയ 2002ല്‍ ലോകകപ്പ് യോഗ്യതയ്‌ക്ക് അരികെ വരെ ടീമിനെയെത്തിച്ചു. ഏറെക്കുറെ ഒറ്റയാള്‍ പോരാട്ടം നടത്തിയിരുന്ന വിയയ്‌ക്കൊപ്പം മികവ് പുലര്‍ത്താനാവുന്ന മറ്റ് താരങ്ങളുടെ അഭാവമായിരുന്നു ടീമിനെ പിന്നോട്ടടുപ്പിച്ചത്. ഒടുവില്‍ 2003ലാണ് താരം തന്‍റെ ഫുട്ബോൾ കരിയർ അവസാനിപ്പിച്ചത്.
ഇതിനിടെ രാഷ്‌ട്രീയത്തിലിറങ്ങിയ താരം നിലവില്‍ ലൈബീരിയയുടെ പ്രസിഡന്‍റാണ്. വിയയ്‌ക്ക് കഴിയാതിരുന്ന ലോകകപ്പില്‍ കളിക്കുകയെന്ന സ്വപ്‌നം വര്‍ഷങ്ങള്‍ക്കിപ്പുറം അദ്ദേഹത്തിന്‍റെ മകന്‍ തിമോത്തി വിയ (ടിം വിയ) യാഥാര്‍ഥ്യമാക്കുകയാണിപ്പോള്‍. ഖത്തര്‍ ലോകകപ്പില്‍ അമേരിക്കയ്‌ക്കായാണ് 22കാരനായ തിമോത്തി വിയ പന്തുതട്ടാനൊരുങ്ങുന്നത്.
ഫ്രഞ്ച് ക്ലബ് ലില്ലെയുടെ വിങ്ങറായ താരത്തില്‍ അമേരിക്കന്‍ ടീമിനും കോച്ച് ഗ്രെഗ് ബെർഹാൾട്ടര്‍ക്കും വലിയ പ്രതീക്ഷയാണുള്ളത്. ലില്ലെയ്‌ക്കായി 65 മത്സരങ്ങള്‍ കളിച്ച തിമോത്തി വിയ ആറ് ഗോളുകള്‍ നേടിയിട്ടുണ്ട്. ഒരുപക്ഷെ ജോർജ് വിയയ്‌ക്കുള്ള നീതി മകന്‍ തിമോത്തിയിലൂടെ നല്‍കാനാവും കാലം കാത്തുവച്ചത്.
ഗ്രൂപ്പ് ബിയില്‍ വെയ്‌ല്‍സ്, ഇംഗ്ലണ്ട്, ഇറാന്‍ എന്നിവര്‍ക്കെതിരായാണ് ഖത്തറില്‍ അമേരിക്ക മത്സരിക്കുന്നത്. നവംബര്‍ 22ന് വെയ്‌ല്‍സിനെതിരായാണ് അമേരിക്കയുടെ ആദ്യ മത്സരം.
also read: 'തല താഴ്ത്തി ജോലി ചെയ്യുക, അതാണ് നല്ലത്'; ക്രിസ്റ്റ്യാനോയ്‌ക്ക് എതിരെ വെയ്ൻ റൂണി
