പാരീസ് : ഫ്രഞ്ച് ഓപ്പണ്‍ ടെന്നിസില്‍ വനിത ഡബിള്‍സിലും അമേരിക്കന്‍ കൗമാര താരം കോക്കോ ഗൗഫിന് നിരാശ. വനിത സിംഗിള്സ് ഫൈനലിന് പിന്നാലെ ഡബിള്‍സിലും കോക്കോ ഗൗഫ് കീഴടങ്ങി. ഫ്രഞ്ച് സഖ്യമായ കരോലിന ഗാര്‍സിയയും ക്രിസ്റ്റീന മ്ലാദെനോവിച്ചുമാണ് എട്ടാം സീഡായ കോക്കോ ഗൗഫ്-ജെസ്സിക്കാ പെഗുല സഖ്യത്തെ തോല്‍പ്പിച്ചത്.
ഒന്നിനെതിരെ രണ്ട് സെറ്റുകള്‍ക്കാണ് ഫ്രഞ്ച് സഖ്യം അമേരിക്കന്‍ സഖ്യത്തെ തോല്‍പ്പിച്ചത്. ആദ്യ സെറ്റ് സ്വന്തമാക്കിയതിന് ശേഷമാണ് ഗൗഫ്-ജെസ്സിക്ക സഖ്യം മത്സരം കൈവിട്ടത്. സ്കോര്‍ 2-6, 6-3, 6-2.
ഇന്നലെ നടന്ന വനിത സിംഗിള്സ് ഫൈനലില്‍ പോളണ്ടിന്‍റെ ഇഗ സ്വിറ്റെകിനോടാണ് കോക്കോ ഗൗഫ് തോല്‍വി വഴങ്ങിയത്. മത്സരത്തില്‍ ഏകപക്ഷീയമായ രണ്ട് സെറ്റുകള്‍ക്കാണ് ഇഗ ഗൗഫിനെ തോല്‍പ്പിച്ചത്. സ്‌കോർ: 6-1, 6-3. ഫ്രഞ്ച് ഓപ്പണില്‍ ഇഗയുടെ രണ്ടാം കിരീടമാണിത്.
2020ല്‍ അമേരിക്കയുടെ തന്നെ സോഫിയ കെനിനെ നേരിട്ടുള്ള സെറ്റുകള്‍ക്ക് തോല്‍പ്പിച്ചായിരുന്നു താരത്തിന്‍റെ ആദ്യ കിരീട നേട്ടം. വിജയത്തോടെ ഈ നൂറ്റാണ്ടില്‍ വനിത ടെന്നിസ് സിംഗിള്‍സില്‍ ഏറ്റവും കുടുതല്‍ തുടര്‍വിജയങ്ങള്‍ നേടിയ താരമെന്ന വീനസ് വില്യംസിന്‍റെ റെക്കോഡിനൊപ്പമെത്താനും ഇഗയ്‌ക്കായി. താരത്തിന്‍റെ തുടര്‍ച്ചയായ 35ാം വിജയമാണിത്. വീനസ് വില്യംസ് 2000ത്തില്‍ തുടര്‍ച്ചയായി 35 മത്സരങ്ങളില്‍ ജയിച്ചിരുന്നു.
