ലിസ്‌ബന്‍: ഖത്തര്‍ ലോകകപ്പിന് ശേഷവും അന്താരാഷ്‌ട്ര ഫുട്‌ബോളില്‍ തുടരാനുള്ള ആഗ്രഹം വെളിപ്പെടുത്തി പോര്‍ച്ചുഗീസ് സൂപ്പര്‍ സ്റ്റാര്‍ ക്രിസ്റ്റ്യാനോ റൊണാൾഡോ. 2024ലെ യൂറോപ്യൻ ചാമ്പ്യൻഷിപ്പിൽ രാജ്യത്തെ പ്രതിനിധീകരിക്കാന്‍ കഴിയുമെന്ന് പ്രതീക്ഷിക്കുന്നതായി ക്രിസ്റ്റ്യാനോ പറഞ്ഞു. പോർച്ചുഗീസ് ഫുട്ബോൾ ഫെഡറേഷന്‍റെ വാർഷിക അവാർഡ് ദാന ചടങ്ങിലാണ് താരം മനസ് തുറന്നത്.
'കുറച്ചു വർഷങ്ങൾ കൂടി ഫെഡറേഷന്‍റെ ഭാഗമാകാൻ കഴിയുമെന്ന് ഞാൻ പ്രതീക്ഷിക്കുന്നു. എനിക്ക് ഇപ്പോഴും പ്രചോദനം തോന്നുന്നു, എന്‍റെ അഭിലാഷങ്ങള്‍ ഉയർന്നതാണ്.
ദേശീയ ടീമിനൊപ്പമുള്ള എന്‍റെ യാത്ര അവസാനിച്ചിട്ടില്ല. നിലവാരമുള്ള നിരവധി യുവ താരങ്ങള്‍ നമുക്കുണ്ട്. ലോകകപ്പിൽ കളിക്കാന്‍ ഞാനുണ്ടാവും. യൂറോപ്യൻ ചാമ്പ്യൻഷിപ്പിൽ പങ്കെടുക്കാനും ഞാൻ ആഗ്രഹിക്കുന്നു", റൊണാൾഡോ പറഞ്ഞു.
ഈ വർഷത്തെ ലോകകപ്പ് തന്‍റെ അവസാന രാജ്യാന്തര ടൂർണമെന്‍റായിരിക്കുമെന്ന് 37കാരനായ ക്രിസ്റ്റ്യാനോ നേരത്തെ പറഞ്ഞിരുന്നു. 2024ല്‍ യൂറോപ്യൻ ചാമ്പ്യൻഷിപ്പ് നടക്കുമ്പോള്‍ 39 വയസായിരിക്കും ക്രിസ്റ്റ്യാനോയുടെ പ്രായം.
അതേസമയം ഇംഗ്ലീഷ് പ്രീമിയര്‍ ലീഗിന്‍റെ പുതിയ സീസണില്‍ പതിഞ്ഞ തുടക്കമാണ് ക്രിസ്റ്റ്യാനോയ്‌ക്ക് ലഭിച്ചത്. പുതിയ പരിശീലകന്‍ എറിക് ടെൻ ഹാഗ് ഒരിക്കല്‍ മാത്രമാണ് ക്രിസ്റ്റ്യാനോയെ മാഞ്ചസ്റ്റര്‍ യുണൈറ്റഡിന്‍റെ ആദ്യ ഇലവനില്‍ ഉള്‍പ്പെടുത്തിയത്.
