ഹാങ്‌ചോ : ഏഷ്യൻ ഗെയിംസിൽ അമ്പെയ്‌ത്തിൽ ഇന്ത്യയ്‌ക്ക് രണ്ട് സ്വർണം. വനിത - പുരുഷ വ്യക്തിഗത കോബൗണ്ട് ഇനങ്ങളിലാണ് ഇന്ത്യ അഭിമാന നേട്ടം കൈവരിച്ചത്. വനിതകളുടെ വ്യക്തിഗത കോബൗണ്ട് വിഭാഗത്തിൽ (archery women’s individual compound event) ഇന്ത്യയുടെ ജ്യോതി സുരേഖ വെന്നം (Jyothi Surekha Vennam) ദക്ഷിണ കൊറിയയുടെ സോ ചിവോണിനെ തോൽപ്പിച്ചാണ് സ്വർണം നേടിയത്.
ആദ്യ ഷോട്ടിൽ ഒമ്പത് പോയിന്‍റ് നേടിയ ജ്യോതി പിന്നീടുള്ള ഷോട്ടുകളിലെല്ലാം 10 സ്‌കോർ വീതം നേടി ആകെ 149 പോയിന്‍റ് നേടിയപ്പോൾ ദക്ഷിണ കൊറിയൻ താരത്തിന് 145 പോയിന്‍റുകൾ മാത്രമാണ് നേടാനായത്. ഇത്തവണത്തെ ഏഷ്യൻ ഗെയിംസിൽ ജ്യോതി നേടുന്ന മൂന്നാമത്തെ സ്വർണമാണിത്. അമ്പെയ്‌ത്തിൽ കോമ്പൗണ്ട് വനിത ടീമിലും കോമ്പൗണ്ട് മിക്‌സഡ് ടീം മത്സരങ്ങളിലുമാണ് ജ്യോതി മറ്റ് രണ്ട് സ്വർണങ്ങൾ നേടിയത്.
മെഡൽ തിളക്കത്തിൽ ഓജസും അഭിഷേകും : അതേസമയം, ഇന്ത്യയുടെ പുരുഷ താരങ്ങൾ മാറ്റുരച്ച വ്യക്തിഗത കോബൗണ്ട് അമ്പെയ്‌ത്ത് മത്സരത്തിൽ ഓജസ് പ്രവീൺ (Ojas Pravin Deotale Won Gold) സ്വർണവും അഭിഷേക് വർമ (Abhishek Verma Won Silver) വെള്ളിയും നേടി. 149 പോയിന്‍റുമായാണ് ഓജസ് വിജയകിരീടം സ്വന്തമാക്കിയത്. ഫുയാങ് യിൻഹു സ്‌പോർട്‌സ് സെന്‍ററിൽ നടന്ന ഫൈനൽ മത്സരത്തിൽ 147 പോയിന്‍റാണ് അഭിഷേക് വർമ നേടിയത്. അതേസമയം, ഏഷ്യൻ ഗെയിംസ് 2023 ൽ ഓജസ് നേടുന്ന മൂന്നാമത്തെ സ്വർണമാണിത്.
ഇതോടെ ആറ് സ്വർണമുൾപ്പടെ ഒൻപത് മെഡലുകളാണ് അമ്പെയ്‌ത്തിൽ (Total Medals In Archery) മാത്രം ഇന്ത്യ നേടിയത്. അമ്പെയ്‌ത്തിൽ കോമ്പൗണ്ട് പുരുഷ ടീമിലും കോമ്പൗണ്ട് മിക്‌സഡ് ടീം മത്സരങ്ങളിലുമാണ് ഓജസ് മറ്റ് രണ്ട് സ്വർണങ്ങൾ നേടിയത്. ഈ വർഷം ആദ്യം ബെർലിനിൽ നടന്ന ലോക ചാമ്പ്യൻഷിപ്പ് മത്സരത്തിലും മഹാരാഷ്‌ട്രയിലെ നാഗ്‌പൂർ സ്വദേശിയായ ഈ 21 കാരൻ വിജയം കണ്ടിരുന്നു.
വെങ്കല നേട്ടത്തിൽ അദിതി : വനിതകളുടെ വ്യക്തിഗത കോബൗണ്ട് വിഭാഗത്തിൽ ഇന്ത്യയുടെ അദിതി ഗോപിചന്ദ് സ്വാമി വെങ്കലവും (Aditi Gopichand Swami won bronze) സ്വന്തമാക്കിയിട്ടുണ്ട്. ഇന്തോനേഷ്യൻ താരമായ റാത്ത് ഫഡ്‌ലിയെ (Indonesian Raith Fadhly) 146-140 ന് തോൽപ്പിച്ചാണ് അദിതി ഇന്ത്യയ്‌ക്കായി മെഡൽ നേടിയത്. ബെർലിനിൽ നടന്ന ലോക ചാമ്പ്യൻഷിപ്പ് മത്സരത്തിൽ അദിതി വിജയം കൊയ്‌തിരുന്നു.
നിലവിൽ പുരോഗമിച്ചുകൊണ്ടിരിക്കുന്ന പല മത്സരങ്ങളിലും മെഡലുറപ്പിച്ച ഇന്ത്യ ചരിത്രത്തിൽ ആദ്യമായി 100 മെഡൽ എന്ന നേട്ടവും ഇത്തവണത്തെ ഏഷ്യൻ ഗെയിംസിലൂടെ സ്വന്തമാക്കി.
