പനാജി: ഐഎസ്‌എല്ലില്‍ ഇന്ന് നടന്ന ബെംഗളൂരു എഫ്‌സി- എടികെ മോഹന്‍ബഗാന്‍ മത്സരം സമനിലയില്‍. അടിയും തിരിച്ചടിയുമായി ഇരു സംഘവും കളം നിറഞ്ഞതോടെ മൂന്ന് ഗോളുകള്‍ വീതം നേടിയാണ് മത്സരം സമനിലയില്‍ പിരിഞ്ഞത്.
സുഭാശിഷ് ബോസ് (13ാം മിനിട്ട്) ഹ്യൂഗോ ബോമസ് (38ാം മിനിട്ട്) റോയ് കൃഷ്ണ (58ാം മിനിട്ട്, പെനാല്‍റ്റി ) എന്നിവര്‍ എടികെക്കായി ലക്ഷ്യം കണ്ടു. ക്ലെയ്റ്റണ്‍ സില്‍വ (18ാം മിനിട്ട്, പെനാല്‍റ്റി), ഡാനിഷ് ഫാറൂഖ്‌ (26ാം മിനിട്ട്,) പ്രിന്‍സ് ഇബ്ര (72ാം മിനിട്ട്) എന്നിവരാണ് ബെംഗളൂരുവിനായി വലകുലുക്കിയത്.
മത്സരം സമനിലയോടെ പോയിന്‍റ് പട്ടികയില്‍ എടികെ മോഹന്‍ ബഗാന്‍ ആറാം സ്ഥാനത്തും ബെംഗളൂരു ഒമ്പതാം സ്ഥാനത്തും തുടരുകയാണ്. ആറ് മത്സരങ്ങളില്‍ രണ്ട് വീതം ജയം, സമനില, തോല്‍വിയുമായി എട്ട് പോയിന്‍റാണ് എടികെയ്‌ക്കുള്ളത്.
ഏഴ്‌ മത്സരങ്ങള്‍ കളിച്ച ബെംഗളൂരുവിന് അഞ്ച് പോയിന്‍റാണുള്ളത്. ഒരു ജയം, രണ്ട് സമനില, നാല് തോല്‍വി എന്നിങ്ങനെയാണ് ടീമിന്‍റെ പട്ടികയിലുള്ളത്.
