ലോക ഫുട്ബോള്‍ ചരിത്രത്തിലെ ഏറ്റവും പഴയ ടൂര്‍ണമെന്‍റുകളില്‍ ഒന്നായ എഫ്എ കപ്പിലെ സെമി പോരാട്ടങ്ങള്‍ക്ക് ഒരുങ്ങി വിഖ്യാതമായ വിംബ്ലി സ്റ്റേഡിയം. കൊവിഡ് 19 പശ്ചാത്തലത്തില്‍ ജൂലൈ 19ന് അടച്ചിട്ട സ്റ്റേഡിയത്തിലാണ് മത്സരങ്ങള്‍ നടക്കുകയെങ്കിലും ആവേശത്തിന് ഒട്ടും കുറവുണ്ടാകില്ല. ഇംഗ്ലണ്ടിലെ വമ്പന്‍ ടീമുകളാണ് സെമിയില്‍ മാറ്റുരക്കുന്നത്.
ആദ്യ പോരാട്ടം ചെല്‍സിയും യുണൈറ്റഡും തമ്മില്‍
ആദ്യ സെമി പോരാട്ടത്തില്‍ ചെല്‍സിയെ മാഞ്ചസ്റ്റര്‍ യുണൈറ്റഡ് നേരിടും. ചാമ്പ്യന്‍സ് ലീഗും എഫ്എ കപ്പും സ്വന്തമാക്കുകയെന്ന ലക്ഷ്യം മുന്നില്‍ കണ്ടാണ് മാഞ്ചസ്റ്റര്‍ യുണൈറ്റഡ് മുന്നോട്ട് പോകുന്നത്. പോള്‍ പോഗ്ബ ഉള്‍പ്പെടെയുള്ള താരങ്ങള്‍ പരിക്ക് ഭേദമായി തിരിച്ചെത്തിയത് യുണൈറ്റഡിന് കരുത്ത് പകരുന്നുണ്ട്. റാഷ്‌ഫോര്‍ഡുള്‍പ്പെടെയുള്ള മുന്നേറ്റ താരങ്ങളും ഫോമിലാണ്. നേരത്തെ സതാംപ്റ്റണെതിരായ മത്സരത്തില്‍ വിജയിച്ചതോടെ യുണൈറ്റഡിന്‍റെ ചാമ്പ്യന്‍സ് ലീഗ് പ്രതീക്ഷകളും സജീവമായിട്ടുണ്ട്. കഴിഞ്ഞ മത്സരത്തില്‍ ഏകപക്ഷീയമായ രണ്ട് ഗോളുകള്‍ക്ക് ചെല്‍സിയെ മാഞ്ചസ്റ്റര്‍ യുണൈറ്റഡ് പരാജയപ്പെടുത്തിയിരുന്നു.
രണ്ട് വര്‍ഷം മുമ്പ് യുണൈറ്റഡിനെ പരാജയപ്പെടുത്തി എഫ്എ കപ്പ് സ്വന്തമാക്കിയ ചെല്‍സിയെ എഴുതി തള്ളാന്‍ സാധിക്കില്ല. ഇപിഎല്ലിലെ പോയിന്‍റ് പട്ടികയില്‍ യുണൈറ്റഡിനെ മറികടന്ന് ഇത്തവണ ചാമ്പ്യന്‍സ് ലീഗ് യോഗ്യത സ്വന്തമാക്കിയ ചെല്‍സി യുണൈറ്റഡിന് വലിയ വെല്ലുവിളി ഉയര്‍ത്തും. ചെല്‍സിയുടെ താരമെന്ന നിലയിലും പരിശീലകനെന്ന നിലയിലും എഫ്എ കപ്പ് സ്വന്തമാക്കാനുള്ള അവസരമാണ് ഫ്രാങ്ക് ലമ്പാര്‍ഡിന് ലഭിച്ചിരിക്കുന്നത്. പരിക്കേറ്റ എന്‍ഗോളൊ കാന്‍റെ കളിക്കില്ലെന്നത് മാത്രമാണ് ലമ്പാര്‍ഡിന് ആശങ്കയുണ്ടാക്കുന്നത്. സ്റ്റാംഫോര്‍ഡ് ബ്രിഡ്‌ജിലേക്ക് എഫ്എ കപ്പ് തിരിച്ചുകൊണ്ടുവരാനാകുമെന്ന പ്രതീക്ഷയിലാണ് ലമ്പാര്‍ഡ്.
നിലവിലെ ചാമ്പ്യന്‍മാര്‍ ആഴ്‌സണലിനെ നേരിടും
അതേസമയം മറ്റൊരു സെമി ഫൈനല്‍സില്‍ നിലവിലെ ചാമ്പ്യന്‍മാരായ മാഞ്ചസ്റ്റര്‍ സിറ്റി ആഴ്‌സണലിനെ നേരിടും. ആറ് തവണ കപ്പുയര്‍ത്തിയ സിറ്റിക്ക് കിരീടം നിലനിര്‍ത്താനാകുമെന്നാണ് പ്രതീക്ഷ. പരിശീലകന്‍ പെപ്പ് ഗാര്‍ഡിയോളക്ക് കീഴില്‍ ഹോം ഗ്രൗണ്ടില്‍ നടന്ന മത്സരത്തില്‍ ആഴ്‌സണലിനെ ഏകപക്ഷീയമായ മൂന്ന് ഗോളുകള്‍ക്ക് പരാജയപ്പെടുത്തിയതിന്‍റെ ആത്മവിശ്വാസത്തോടെയാണ് സിറ്റി സെമി പോരാട്ടത്തിന് എത്തുന്നത്. ചിലിയന്‍ ഗോള്‍ കീപ്പര്‍ ക്ലൗഡിയോ ബ്രാവോക്ക് പരിക്കേറ്റത് ചെറിയ ആശങ്കകള്‍ ഉണ്ടാക്കിയെങ്കിലും താരം ആഴ്സണിലെനെതിരായ മത്സരത്തില്‍ കളിക്കുമെന്ന് ഗാര്‍ഡിയോള പറഞ്ഞു.
അതേസമയം പുതിയ പരിശീലകന്‍ മൈക്കല്‍ അട്ടേരക്ക് കീഴില്‍ കളി പഠിക്കുന്ന ഗണ്ണേഴ്‌സ് എതിരാളികള്‍ക്ക് വലിയ വെല്ലുവിളിയാണ് ഉയര്‍ത്തുന്നത്. ഇതിനകം 13 തവണ എഫ്എ കപ്പ് സ്വന്തമാക്കിയ ആഴ്‌സണലിന്‍റെ പ്രതീകക്ഷകളും സജീവമാണ്. സിറ്റിയുടെ പരിശീലകന്‍ പെപ്പ് ഗാര്‍ഡിയോളക്ക് ഒപ്പം പരിശീലകനെന്ന നിലയില്‍ പ്രവര്‍ത്തിച്ച് പരിചയമുള്ള അട്ടേരക്ക് അദ്ദേഹത്തിന്‍റെ തന്ത്രങ്ങള്‍ മറികടക്കാനാകുമെന്നാണ് ആരാധകരുടെ പ്രതീക്ഷ.
കൊവിഡ് 19 പശ്ചാത്തലത്തില്‍ ഫൈനല്‍ മത്സരത്തിന്‍റെ സ്ഥലവും തിയതി ഇതേവരെ പ്രഖ്യാപിച്ചിട്ടില്ല. പതിവായി എഫ്എ കപ്പിന്‍റെ കലാശപ്പോര് നടക്കുന്ന വിംബ്ലിയില്‍ ഇത്തവണയും ഫൈനല്‍ നടക്കുമെന്നാണ് പ്രതീക്ഷ.
