അഹമ്മദാബാദ് : ഇന്ത്യ ആതിഥേയരാവുന്ന ഏകദിന ലോകകപ്പിന് (Cricket World Cup 2023) ഇനി മണിക്കൂറുകള്‍ മാത്രമാണ് ശേഷിക്കുന്നത്. സ്വന്തം മണ്ണില്‍ നടക്കുന്ന ടൂര്‍ണമെന്‍റില്‍ ഫേവറേറ്റുകളുടെ പട്ടികയില്‍ മുന്നില്‍ തന്നെയാണ് രോഹിത് ശര്‍മയുടെ നേതൃത്വത്തില്‍ ഇറങ്ങുന്ന ഇന്ത്യയുള്ളത്. ടീമുമായി ബന്ധപ്പെട്ടുള്ള ചര്‍ച്ചകളില്‍ ഇന്ത്യയുടെ വിക്കറ്റ് കീപ്പര്‍ സ്ഥാനവും ഹോട്ട് ടോപ്പിക്കാണ് (Nayan Mongia On Ishan Kishan).
കെഎല്‍ രാഹുല്‍ (KL Rahul) , ഇഷാന്‍ കിഷന്‍ (Ishan Kishan) എന്നിവരില്‍ ആരാവും വിക്കറ്റ് കീപ്പര്‍ ബാറ്ററായി പ്ലെയിങ് ഇലവനില്‍ എത്തുകയെന്നാണ് ആരാധകര്‍ ഉറ്റുനോക്കുന്നത്. ഇപ്പോഴിതാ വിഷയത്തില്‍ പ്രതികരിച്ചിരിക്കുകയാണ് ഇന്ത്യയുടെ മുന്‍ വിക്കറ്റ് കീപ്പര്‍ ബാറ്റര്‍ നയന്‍ മോംഗിയ. ഇഷാന്‍ കിഷനാണ് വിക്കറ്റ് കീപ്പറായി പ്ലെയിങ് ഇലവനില്‍ എത്തേണ്ടതെന്നാണ് നയന്‍ മോംഗിയ പറയുന്നത് (Nayan Mongia Picks Ishan Kishan as Wicketkeeper in Indian Team cricket World Cup 2023).
ഇടിവി ഭാരതിന് നല്‍കിയ അഭിമുഖത്തിലാണ് ഇന്ത്യയുടെ മുന്‍ താരം വിഷയത്തില്‍ സംസാരിച്ചത്. "ലോകകപ്പില്‍ ഇന്ത്യയ്ക്ക് ഒരു സ്ഥിരം വിക്കറ്റ് കീപ്പർ ഉണ്ടായിരിക്കണം. ബോളർമാർക്ക് ആത്മവിശ്വാസം നൽകുന്ന ആ റോളിൽ ഇഷാൻ കിഷനെയാണ് ഞാൻ തിരഞ്ഞെടുക്കുന്നത്. ഇഷാൻ കിഷൻ മികച്ച ഇടംകൈയ്യൻ ബാറ്റർ കൂടിയാണ് (Nayan Mongia on Ishan Kishan). എന്നാല്‍, ഇഷാനും രാഹുലും ടീമിലുണ്ടെങ്കിൽ പ്രതിസന്ധി ഘട്ടങ്ങളിൽ സഹായകരമാവും"- നയന്‍ മോംഗിയ (Nayan Mongia) പറഞ്ഞു.
സമ്മര്‍ദത്തിന് അടിപ്പെടരുത്: ടൂര്‍ണമെന്‍റിലെ ഓരോ മത്സരത്തിലും രോഹിത്തും സംഘവും ശ്രദ്ധകേന്ദ്രീകരിക്കേണ്ടതുണ്ടെന്നും അദ്ദേഹം നിര്‍ദേശിച്ചു. "ടൂര്‍ണമെന്‍റിലുടനീളം എല്ലാ കളിക്കാര്‍ക്കും നിർണായക പങ്ക് വഹിക്കാനുണ്ട്. നമ്മുടെ ടീമില്‍ ആക്രമണോത്സുകരായ ബാറ്റർമാരും ഓൾറൗണ്ടർമാരും മികച്ച നിലവാരമുള്ള ബോളർമാരുമുണ്ട്.
ഓരോ മത്സരത്തിലും ടീം ശ്രദ്ധ കേന്ദ്രീകരിക്കണം. ഒരിക്കലും പ്രതീക്ഷകളുടെ സമ്മര്‍ദത്തിന് അടിപ്പെടരുത്. സ്വന്തം മണ്ണില്‍ സ്വന്തം കാണികള്‍ക്ക് മുന്നിലാണ് ഇന്ത്യന്‍ ടീം കളിക്കുന്നത്. അതിനാൽ ഈ ഘടകങ്ങൾ അവർക്ക് അനുകൂലമായി പ്രവർത്തിക്കണം. ഇത്തവണ കിരീടം ഉയർത്താനും 2011 ന് ശേഷം ആദ്യമായി ഒരു ലോകകപ്പ് നേടാനും ഇന്ത്യ ശക്തരായ മത്സരാർഥികളാണ്" - 53കാരനായ നയന്‍ മോംഗിയ വ്യക്തമാക്കി.
സ്‌പിന്നര്‍മാര്‍ നിര്‍ണായകമാവും : ലോകകപ്പ് മത്സരങ്ങളില്‍ ഇന്ത്യയുടെ വിജയത്തില്‍ സ്‌പിന്നര്‍മാരുടെ പ്രകടനം നിര്‍ണായകമാവുമെന്നും നയൻ മോംഗിയ പറഞ്ഞു. ആര്‍ അശ്വിൻ, കുൽദീപ് യാദവ്, രവീന്ദ്ര ജഡേജ എന്നിവരടങ്ങുന്ന ആതിഥേയരുടെ സ്‌പിന്‍ ത്രയത്തിന്, ഇന്ത്യയിലെ സ്‌പിന്നിന് അനുകൂലമായ പിച്ചുകളില്‍ എതിരാളികളെ നിയന്ത്രിക്കാൻ കഴിയുമെന്നും അദ്ദേഹം കൂട്ടിച്ചേര്‍ത്തു.
ഇന്ത്യ- പാക് മത്സരം യുദ്ധമല്ല : ഒക്‌ടോബർ 14-ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കാനിരിക്കുന്ന ഇന്ത്യ-പാകിസ്ഥാൻ മത്സരത്തെക്കുറിച്ചുള്ള തന്‍റെ കാഴ്ചപ്പാടുകളും മുന്‍ വിക്കറ്റ് കീപ്പര്‍ ബാറ്റര്‍ പങ്കുവച്ചു. ഇന്ത്യ-പാക് മത്സരം ഒരു യുദ്ധമായി കണക്കാക്കരുത്. ടൂർണമെന്‍റിലെ മറ്റേതൊരു മത്സരത്തെ പോലെ തന്നെ ഇതിനേയും കാണണമെന്നാണ് 53-കാരന്‍ ആരാധകരോട് അഭ്യർഥിക്കുന്നത്.
