മുംബൈ: ടി20 ലോകകപ്പില്‍ നിന്നും പരിക്കേറ്റ് പുറത്തായ പേസര്‍ ജസ്പ്രീത് ബുംറയുടെ പകരക്കാരനെ പ്രഖ്യാപിച്ച് ബിസിസിഐ. സ്റ്റാന്ഡ് ബൈ താരങ്ങളുടെ പട്ടികയിലുണ്ടായിരുന്ന മുഹമ്മദ് ഷമിയാണ് പ്രധാന സ്ക്വാഡില്‍ ഇടം നേടിയത്. ഷമി ഓസ്‌ട്രേലിയയിൽ എത്തിയിട്ടുണ്ടെന്നും സന്നാഹ മത്സരങ്ങൾക്ക് മുന്നോടിയായി ടീമിനൊപ്പം ചേരുമെന്നും ബിസിസിഐ സെക്രട്ടറി ജയ് ഷാ അറിയിച്ചു.
ഷമി പ്രധാന സ്ക്വാഡിന്‍റെ ഭാഗമായതോടെ സ്റ്റാന്ഡ് ബൈ താരങ്ങളുടെ പട്ടികയില്‍ പകരക്കാരനായി മുഹമ്മദ് സിറാജ് ഇടം നേടി. ഈ പട്ടികയില്‍ നിന്നും പരിക്കേറ്റ് പുറത്തായ ദീപക് ചഹാറിന് പകരം ശാര്‍ദുല്‍ താക്കൂറിനെയും ഉള്‍പ്പെടുത്തിയിട്ടുണ്ട്.
കൊവിഡിനെ തുടര്‍ന്ന് ഓസ്‌ട്രേലിയ, ദക്ഷിണാഫ്രിക്ക എന്നീ ടീമുകള്‍ക്കെതിരായ ടി20 പരമ്പരയില്‍ ഷമിക്ക് കളിക്കാന്‍ കഴിഞ്ഞിരുന്നില്ല. ഇതോടെ ദേശീയ ക്രിക്കറ്റ് അക്കാദമിയില്‍ നടന്ന പരിശോധനയില്‍ ഫിറ്റ്‌നസ് തെളിയിച്ചതിന് ശേഷമാണ് ഷമി ഓസ്‌ട്രേലിയയിലേക്ക് പറന്നത്.
ഇന്ത്യയ്‌ക്കായി 17 ടി20 മത്സരങ്ങള്‍ കളിച്ച ഷമി 18 വിക്കറ്റുകള്‍ നേടിയിട്ടുണ്ട്. ഓക്‌ടോബര്‍ 16 മുതല്‍ നവംബര്‍ 13 വരെയാണ് ഓസ്‌ട്രേലിയയില്‍ ടി20 ലോകകപ്പ് നടക്കുന്നത്.
