കറാച്ചി: കഴിഞ്ഞ ആഴ്‌ച കൊൽക്കത്ത നൈറ്റ് റൈഡേഴ്‌സിനെതിരെ മുംബൈ ഇന്ത്യൻസിന്‍റെ കുപ്പായത്തിലാണ് ഇതിഹാസ താരം സച്ചിന് ടെണ്ടുല്‍ക്കറുടെ മകന്‍ അര്ജുന് ടെണ്ടുല്‍ക്കര്‍ ഐപിഎല്‍ അരങ്ങേറ്റം നടത്തിയത്. തന്‍റെ ആദ്യ മത്സരത്തില്‍ 23കാരനായ അര്ജുന് വിക്കറ്റ് ഒന്നും ലഭിച്ചിരുന്നില്ല. തുടര്‍ന്ന് സണ്‍റൈസേഴ്‌സ് ഹൈദരാബാദിനെതിരെയാണ് കന്നി വിക്കറ്റ് നേടുന്നത്.
സണ്‍റൈസേഴ്‌സ് താരം ഭുവനേശ്വര്‍ കുമാറിനെ മുംബൈ നായകന്‍ രോഹിത് ശര്‍മയുടെ കയ്യില്‍ എത്തിച്ചായിരുന്നു അര്ജുന് അക്കൗണ്ട് തുറന്നത്. ഇന്നിങ്‌സിന്‍റെ അവസാന ഓവറിലായിരുന്നു താരം ഈ വിക്കറ്റ് വീഴ്‌ത്തിയത്. ഈ ഓവറില്‍ 20 റണ്‍സായിരുന്നു ഹൈദരാബാദിന് വിജയത്തിന് വേണ്ടിയിരുന്നത്.
അഞ്ച് റണ്‍സ് മാത്രം വഴങ്ങിയ അര്ജുന് നായകന്‍റെ പ്രതീക്ഷ കാക്കുകയും ചെയ്‌തിരുന്നു. ഇതിന് പിന്നാലെ നിരവധി കോണുകളില്‍ നിന്നും താരത്തിന് അഭിനന്ദനങ്ങളുമെത്തി. ഇതിനിടെ പേസറായ അര്‍ജുന്‍റെ പന്തുകളുടെ വേഗവും ചര്‍ച്ചയായിരുന്നു. മണിക്കൂറില്‍ വെറും 120 കിലോ മീറ്ററാണ് അര്‍ജുന്‍റെ പന്തുകളുടെ ശരാശരി വേഗമെന്നും സ്പിന്നറായ പാകിസ്ഥാന്‍റെ മുന്‍ നായകന്‍ ഷാഹിദ് അഫ്രീദി പോലും മണിക്കൂറില്‍ 134 കിലോ മീറ്റര്‍ വേഗത്തിലാണ് പന്തെറിയുന്നതെന്നും ചൂണ്ടിക്കാട്ടി സോഷ്യല്‍ മീഡിയയില്‍ ഏറെ ട്രോളുകളും നിറഞ്ഞിരുന്നു.
ഇപ്പോഴിതാ അര്ജുന് ടെണ്ടുല്‍ക്കര്‍ തന്‍റെ പന്തുകളുടെ വേഗം വര്‍ധിപ്പിക്കണമെന്ന നിര്‍ദേശവുമായി രംഗത്ത് എത്തിയിരിക്കുകയാണ് പാകിസ്ഥാന്‍റെ മുന്‍ നായകന്‍ റാഷിദ് ലത്തീഫ്. പന്തുകളുടെ വേഗത വര്‍ധിപ്പിക്കാന്‍ തന്‍റെ ബാലന്‍സ് ശരിയാക്കാന്‍ അര്ജുന് കൂടുതല്‍ പരിശ്രമങ്ങള്‍ നടത്തേണ്ടതുണ്ടെന്നും റാഷിദ് ലത്തീഫ് പറഞ്ഞു.
"അർജുൻ തന്‍റെ കരിയറിന്‍റെ പ്രാരംഭ ഘട്ടത്തിലാണ്. വളരെയധികം കഠിനാധ്വാനം ചെയ്യേണ്ടതുണ്ട്. അവന്‍റെ അലൈൻമെന്‍റ് നല്ലതല്ല, വേഗത്തില്‍ പന്തെറിയാനും അവന് കഴിയുന്നില്ല.
ഒരു നല്ല ബയോമെക്കാനിക്കൽ കൺസൾട്ടന്‍റിന്‍റെ ഉപദേശം സ്വീകരിക്കുകയാണെങ്കില്‍, ഒരുപക്ഷേ തന്‍റെ പന്തുകളുടെ വേഗം വര്‍ധിപ്പിക്കാന്‍ അവന് കഴിഞ്ഞേക്കും. ഒരു കളിക്കാരനെ പരിശീലിപ്പിക്കുകയും അയാളുടെ കഴിവുകള്‍ മെച്ചപ്പെടുത്തുകയും ചെയ്യുന്നത് സസൂക്ഷ്മം കൈകാര്യം ചെയ്യേണ്ടുന്ന വിഷയമാണ്. അര്‍ജുന്‍റെ കാര്യത്തില്‍ സച്ചിന് അത് സ്വയം ചെയ്യാമായിരുന്നു.
എന്നാല്‍ അതിനായി അദ്ദേഹം ആഭ്യന്തര ക്രിക്കറ്റിനെ ആശ്രയിക്കുകയാണ് ചെയ്‌തത്. എപ്പോഴും നിങ്ങളുടെ അടിത്തറ വളരെ ശക്തമായിരിക്കണം. അവന്‍റെ ലാന്‍റിങ് ശരിയല്ല. അവന്‍റെ ബാലന്‍സും അത്ര നല്ലതല്ല.
അതൊക്കെയാണ് അവന്‍റെ വേഗതയെ ബാധിക്കുന്നത്. അവന് തന്‍റെ കരിയറിന്‍റെ പ്രാരംഭ ഘട്ടത്തിലാണെന്ന് ഞാന്‍ അവര്‍ത്തിക്കുകയാണ്. മികച്ച പരിശ്രമം നടത്തിയാല്‍ അവന് 135 കിലോമീറ്റർ വരെ വേഗത്തില്‍ പന്തെറിയാന്‍ കഴിയും.
അവനൊരു മികച്ച ബാറ്റര്‍ കൂടിയാണ്. 2-3 വർഷത്തിനുള്ളിൽ അയാൾക്ക് ഒരു മികച്ച കളിക്കാരനാകാൻ കഴിയും", റാഷിദ് ലത്തീഫ് പറഞ്ഞു. തന്‍റെ യൂട്യൂബ് ചാനലിലൂടെയാണ് പാക് മുന്‍ താരത്തിന്‍റെ പ്രതികരണം.
മുംബൈ ഇന്ത്യന്‍സ് ക്യാമ്പിലെ സച്ചിന്‍റെ സാന്നിധ്യം എടുത്തുകാണിച്ച ലത്തീഫ്, മറ്റേതെങ്കിലും ഫ്രാഞ്ചൈസിക്ക് വേണ്ടിയാണ് അര്ജുന് കളിച്ചിരുന്നതെങ്കില്‍ താരത്തിന്‍റെ മാനസികാവസ്ഥ വ്യത്യസ്‌തമാകുമായിരുന്നുവെന്നും അഭിപ്രായപ്പെട്ടു.
ALSO READ: 'കളി ജയിപ്പിക്കാനുള്ള കഴിവ് ആര്‍ക്കെന്ന് രാജസ്ഥാന്‍ മനസിലാക്കണം'; റിയാന്‍ പരാഗിനെതിരെ അമോൽ മജുംദാർ
