മെല്‍ബണ്‍ : ഇന്ത്യൻ പ്രീമിയർ ലീഗിന്‍റെ (ഐപിഎൽ) രണ്ടാം പാദത്തിൽ പങ്കെടുക്കാന്‍ പ്രധാന താരങ്ങള്‍ക്ക് അനുമതി നല്‍കി ക്രിക്കറ്റ് ഓസ്‌ട്രേലിയ (സിഎ).
അഫ്‌ഗാനിസ്ഥാനെതിരായ ഏകദിന പരമ്പര മാറ്റിവച്ചതിന് പിന്നാലെ, വർഷാവസാനം നടക്കുന്ന ടി20 ലോകകപ്പിനുള്ള തയ്യാറെടുപ്പിന്‍റെ ഭാഗമായാണ് ക്രിക്കറ്റ് ഓസ്ട്രേലിയയുടെ നടപടി.
ഡേവിഡ് വാർണർ, സ്റ്റീവ് സ്മിത്ത്, ഗ്ലെൻ മാക്‌സ്‌വെല്‍, മാർക്കസ് സ്റ്റോയിനിസ് തുടങ്ങിയ താരങ്ങള്‍ക്ക് രാജ്യത്തെ ആഭ്യന്തര ടി20 മത്സരങ്ങളുടെ ഓപ്പണിങ് റൗണ്ടുകള്‍ നഷ്ടപ്പെട്ടിരുന്നു.
ഇതോടെ ടി20 ലോക കപ്പിന്കൂടി വേദിയായ യുഎയില്‍ ഐപിഎല്ലിനെത്തുന്നത് താരങ്ങള്‍ക്ക് മികച്ച തയ്യാറെടുപ്പിനുള്ള അവസരമാവുമെന്ന് അധികൃതര്‍ വ്യക്തമാക്കി.
അതേസമയം ഓസീസ് താരങ്ങള്‍ ഐപിഎല്ലിനായി തയ്യാറാവണമെന്ന് മുന്‍ നായകനും ഡല്‍ഹി ക്യാപിറ്റല്‍സ് പരിശീലകനുമായ റിക്കി പോണ്ടിങ് നേരത്തേ അഭിപ്രായപ്പെട്ടിരുന്നു.
also read: ഉൻമുക്ത് ചന്ദ് ഇന്ത്യൻ ക്രിക്കറ്റിൽ നിന്ന് കളമൊഴിഞ്ഞു; വിരമിക്കൽ 28-ാം വയസിൽ
സെപ്റ്റംബർ, ഒക്ടോബർ മാസങ്ങളിലായാണ് യുഎഇയിൽ ഐപിഎല്ലിന്‍റെ രണ്ടാം പാദ മത്സരങ്ങള്‍ നടക്കുക. ഫൈനലടക്കം 31 മത്സരങ്ങളാണ് സീസണില്‍ ഇനി അവശേഷിക്കുന്നത്.
ആറ് കളിക്കാര്‍ക്കും രണ്ട് സ്റ്റാഫിനും കൊവിഡ് സ്ഥിരീകരിച്ചതോടെ മെയ് നാലിനാണ് ബിസിസിഐ ടൂര്‍ണമെന്‍റ് നിര്‍ത്തിവച്ചത്. ഇതിന് മുന്‍പേ സീസണിൽ 29 മത്സരങ്ങൾ മാത്രമാണ് പൂര്‍ത്തിയായത്.
