മുംബൈ : ക്രിക്കറ്റ് ആരാധകര്‍ ആവേശത്തോടെ കാത്തിരിക്കുന്ന ഐപിഎല്‍ 17-ാം പതിപ്പിനുള്ള താരലേലം ദുബായില്‍ നടക്കുമെന്ന് റിപ്പോര്‍ട്ട് (IPL Auction 2024). ചരിത്രത്തില്‍ ആദ്യമായിട്ടാണ് ഐപിഎല്‍ താരലേലം ഇന്ത്യയ്‌ക്ക് പുറത്ത് നടത്താനൊരുങ്ങുന്നത്. ഈ വര്‍ഷം ഡിസംബര്‍ 19നാണ് താരലേലം നടക്കുന്നത്.
കഴിഞ്ഞ വര്‍ഷം ഇസ്‌താംബൂളില്‍ വച്ച് ഐപിഎല്‍ താരലേലം നടത്താനായിരുന്നു ബിസിസിഐയുടെ പദ്ധതി. എന്നാല്‍, പിന്നീട് ഇത് ഉപേക്ഷിക്കുകയും കൊച്ചിയില്‍ വച്ച് മിനി താരലേലം സംഘടിപ്പിക്കുകയുമായിരുന്നു. മെഗ താരലേലത്തിന് മുന്നോടിയായി നടക്കുന്ന അവസാനത്തെ മിനി താരലേലത്തിനാണ് ഇപ്രാവശ്യം ദുബായ് വേദിയാകാനൊരുങ്ങുന്നത്.
പുതിയ സീസണിന് മുന്നോടിയായി വിവിധ ഫ്രാഞ്ചൈസികള്‍ ടീമില്‍ നിലനിര്‍ത്തുന്ന താരങ്ങളുടെ അന്തിമ പട്ടിക സമര്‍പ്പിക്കാനുള്ള അവസാന തീയതി നവംബര്‍ 26 ആക്കി. നേരത്തെ നവംബര്‍ 15നകം ടീമുകള്‍ താരങ്ങളുടെ ലിസ്റ്റ് സമര്‍പ്പിക്കണമെന്നായിരുന്നു നിര്‍ദേശം. താരങ്ങളെ സ്വന്തമാക്കാന്‍ ടീമുകള്‍ക്ക് ചെലവഴിക്കാന്‍ സാധിക്കുന്ന തുകയും വര്‍ധിപ്പിച്ചിട്ടുണ്ട്.
കഴിഞ്ഞ വര്‍ഷം ഈ തുക 95 കോടി ആയിരുന്നു. എന്നാല്‍, ഇപ്രാവശ്യം ഇതിലേക്ക് 5 കോടിയുടെ വര്‍ധനവാണ് വരുത്തിയിരിക്കുന്നത്. നിലവില്‍ പഞ്ചാബ് കിങ്സിന്റെ പക്കലാണ് കൂടുതല്‍ തുക ബാലന്‍സായുള്ളത് (Remaining Purse Balance Of IPL Teams).
പഞ്ചാബ് കിങ്സിന്റെ (Punjab Kings) കൈവശം നിലവില്‍ 12.20 കോടിയാണ് പഴ്‌സ് തുകയായി ബാക്കിയുള്ളത്. സണ്‍ റൈസേഴ്‌സ് ഹൈദരാബാദിന്‍റെ (Sun Risers Hyderabad) പക്കല്‍ 6.55 കോടിയും, കഴിഞ്ഞ പ്രാവശ്യത്തെ റണ്ണര്‍ അപ്പായ ഗുജറാത്ത് ടൈറ്റന്‍സ് (Gujarat Titans), ഡല്‍ഹി കാപിറ്റല്‍സ് (Delhi Capitals) ടീമുകളുടെ കൈവശം 4.45 കോടിയും പഴ്‌സ് തുക ശേഷിക്കുന്നുണ്ട്.
ലഖ്‌നൗ സൂപ്പര്‍ ജയന്‍റ്‌സ് (Lucknow Super Giants), രാജസ്ഥാന്‍ റോയല്‍സ് (Rajasthan Royals) ടീമുകള്‍ക്ക് പഴ്‌സ് തുകയായി ബാക്കിയുള്ളത് 3.35 കോടിയാണ്. റോയല്‍ ചലഞ്ചേഴ്‌സ് ബാംഗ്ലൂരിന്‍റെ (Royal Challengers Bangalore) കൈവശം ശേഷിക്കുന്നത് 1.75 കോടിയാണ്. മുന്‍ ചാമ്പ്യന്മാരായ കൊല്‍ക്കത്ത നൈറ്റ് റൈഡേഴ്‌സിന്‍റെ (Kolkata Knight Riders) പക്കല്‍ നിലവില്‍ പഴ്‌സ് തുകയായി 1.65 കോടിയുണ്ട്.
നിലവിലെ ചാമ്പ്യന്മാരായ ചെന്നൈ സൂപ്പര്‍ കിങ്സിന്റെ (Chennai Super Kings) പക്കല്‍ 1.5 കോടി മാത്രമാണ് ഉള്ളത്. ഐപിഎല്‍ കിരീടം കൂടുതല്‍ പ്രാവശ്യം സ്വന്തമാക്കിയ മുംബൈ ഇന്ത്യന്‍സിന് (Mumbai Indians) നിലവില്‍ പഴ്‌സ് തുകയായി ഉള്ളത് അഞ്ച് ലക്ഷം രൂപ മാത്രമാണ്.
