ന്യൂഡല്‍ഹി: ഇന്ത്യൻ വ്യവസായിയും ഐപിഎല്‍ ടീമായ കിംഗ്സ് ഇലവൻ പഞ്ചാബിന്‍റെ സഹ ഉടമയുമായ നെസ് വാദിയക്ക് രണ്ട് വര്‍ഷം തടവ് ശിക്ഷ. മയക്കുമരുന്ന് കൈവശം സൂക്ഷിച്ചതിന് ജപ്പാന്‍ കോടതിയാണ് ശിക്ഷ വിധിച്ചത്. ജപ്പാൻ ദ്വീപായ ഹോക്കൈഡോയിലെ ചിറ്റോസ് വിമാനത്താവളത്തില്‍ വച്ചാണ് 25 ഗ്രാം കഞ്ചാവ് ഓയിലുമായി നെസിനെ പിടികൂടിയത്. കഴിഞ്ഞ മാർച്ചിലായിരുന്നു സംഭവം. സ്വന്തം ആവശ്യത്തിനായാണ് മയക്കുമരുന്ന് കൈവശം വച്ചതെന്ന് വാദിയ കുറ്റസമ്മതം നടത്തിയിരുന്നു.
ഐപിഎല്‍ നിയമപ്രകാരം ടീം ഒഫിഷ്യല്‍സ് ടീമിനെയോ ലീഗിനെയോ അപകീര്‍ത്തിപ്പെടുത്തുന്ന പ്രവൃത്തികളില്‍ ഏര്‍പ്പെടാന്‍ പാടില്ല. തെറ്റുകാരനാണെന്ന് കണ്ടെത്തിയാല്‍ ആ ടീമിനെ സസ്പെന്‍ഡ് ചെയ്യാനോ ടെര്‍മിനേറ്റ് ചെയ്യാനോ സാധിക്കും. ചെന്നൈ സൂപ്പര്‍ കിങ്സും രാജസ്ഥാന്‍ റോയല്‍സും ഇത്തരം കാരണങ്ങളാല്‍ രണ്ട് വര്‍ഷത്തെ വിലക്ക് നേരിട്ടിരുന്നു. ബിസിസിഐയോ സുപ്രീം കോടതി നിയോഗിച്ച സമിതിയോ ഈ വിഷയത്തില്‍ ഒരു അഭിപ്രായവും ഇതുവരെ രേഖപ്പെടുത്തിയിട്ടില്ല. വ്യവസായിയായ നുസ്ലി വാദിയയുടെ മൂത്തമകനാണ് നെസ് വാദിയ. 283 ഗ്രൂപ്പുകളിലായി പടർന്നുകിടക്കുന്ന വാദിയ ഗ്രൂപ്പിന്‍റെ അവകാശി കൂടിയാണ് നെസ്. ജപ്പാൻ കോടതി ശിക്ഷ വിധിച്ചെങ്കിലും നെസ് ഇപ്പോള്‍ ഇന്ത്യയിലാണുള്ളത്.
